УИХ-ын нэр бүхий 16 гишүүн М.Энхсайхан сайдад санал асуулга хүргүүлсэн. Тэд одоо хэлэлцэж буй Тавантолгойн  хэлэлцээрт эргэлзмээр, илүү тодруулмаар зүйл олон байна гэж УИХ-ын гишүүн Л.Эрдэнэчимэгийн бланкан дээрх албан бичигтээ дурджээ. Санал асуулга тавьж байгаа гишүүд, Тавантолгойн хөрөнгө оруулагчийн тендерт ялагчийн 51 хувийг үндэсний компани эзэмших Засгийн газрын тогтоолтой. Одоо шалгараад байгаа “Энержи ресурс-Шиньхуа-Сумитомо” гэсэн хослолд манай улсын дотоодын компани 51-ээс доошгүй хувийг эзэмшиж чадаж байгаа эсэх, Тавантолгой-Гашуунсухайтын 267 км төмөр замын суурь бүтэц нь  хуулийн дагуу Монголын талын мэдэлд үлдэж байгаа эсэх, энэ тендерт ард түмэнд тараасан 1072 ширхэг хувьцааг  яаж тусгаж байгаа зэргээр 20 гаруй зүйлийг  тодруулахыг хүсчээ. Гишүүд энэхүү асуулгынхаа хариуг УИХ-ын нэгдсэн чуулган дээр танилцуулахыг хүссэн байна.

Тодруулбал, Тавантолгойн тендерт шалгарсан компаниудаас Хятадын Шиньхуа-гийн оролцоо хэт өндөр, Сумитомо зөвхөн 30 хүртэл хувийн борлуулалт хийхээр орж ирж байгаа, Тавантолгой-Гашуунсухайтын төмөр замыг Шиньхуа групп эзэмшиж 30 жилийн дараа 51 хувийг нь Монголын талд хүлээлгэж өгөхөөр гэрээний төслийг бэлтгэж байгаа зэрэг нь гишүүдийг ийнхүү асуулга илгээхэд хүргэсэн бололтой. 

Тэгвэл Тавантолгой төслийн ахлагч М.Энхсайхан энэ талаар фэйсбүүк хуудаснаа “УИХ-ын гишүүдийн гарын үсэг бүхий Асуулгыг өнөө өглөө албан ёсоор хүлээн авлаа. Нэгдмэл ойлголтыг бүрдүүлэхэд чиглэгдсэн чухал асуудлуудыг хөнджээ. Хариултыг бичгээр өгөх болно. Хэлэлцээг намайг ганцаараа хийгээд байна гэж ойлгосон хүн байна. Megaproject.mn сайтаас ажлын хэсэг гэдэг рүү орвол ямар хүмүүс голчлон ажиллаж байгаа нь харагдах болно.  Нүүрсний үнэ унасан нөхцөлд ТТ-г худалдах нь зөв үү гэж будилах дарга байх юм. Ордоо худалдах тухай яриагүй, ордод хөрөнгө оруулагчийг татаж тэдний эрсдэл гаргаж хийх хөрөнгөөр Монгол босч ирэх тухай ярьж байгаа гэдгийг дээрх сайтаас ойлгомоор. Бусад асуудлаар авах гээхийн ухаанаар хандаж болохоор байлаа. Би хувьдаа Мегатөслийг хэрэгжүүлэх Нэгдүгээр сонголтыг сонгоно. Энэ сонголт зөвхөн Засгийн газрыг дэмжих сонголт биш. Дэлхий дахинд Монголын ард түмнээс өгөх хамгийн зөв мессеж болох учир та бүгдийг 1 дугаарыг сонгохыг уриалж байна” хэмээн бичжээ.

Монгол Улсын Засгийн газар 2011 оноос Тавантолгойн  ордыг эдийн засгийн эргэлтэд оруулахаар төсөл хэрэгжүүлж эхэлсэн ч өнгөрсөн дөрвөн жилийн турш уг төсөл гацаатай байсан юм. Харин 2014 оны сүүлээр Тавантолгойн хөрөнгө оруулагчдыг тодруулж, хоёр дахь шатны хэлэлцээг эхлүүлээд байгаа юм.