АН-ын бүлгийн ээлжит хурал өчигдөр болсон. Хуралдаанаар хэлэлцсэн асуудлын талаар өнөөдөр тус бүлгийн ахлагч Б.Гарамгайбаатар болон дэд дарга С.Одонтуяа нар мэдээлэл өглөө.

АН-ын бүлэг хуралдаанаараа эхлээд Таван толгойн төслийн ажлын хэсэгт явуулсан асуулгынхаа хариуг бичгээр авч, нэмэлт хэлэлцүүлэг үр дүнгийн талаар мэдээлэл сонссон байна. Үүний дараа Архидан согтуурахтай тэмцэх үндсэний хөтөлбөрийг УИХ-д өргөн барих гэж буйтай холбогдуулан Согтууруулах ундааны хяналтын тухай хуулийн төслийг хууль санаачлагчид нь татаж авах эсэх асуудлыг бүлгийн хурлаар хэлэлцээд татаж авахаар болжээ.

Төрийн албан хаагчдын цотхотгол, халаа сэлгээний асуудал ихэссэн талаар мэдээлэл гарах болсон. Үүнтэй холбогдуулан АН-ын бүлгээс томилогдсон сайд нартай уулзалт зохион байгуулж, мэдээлэл авчээ. Өнөөдрийн байдлаар  Гадаад харилцааны яам, Уул уурхайн яам, Аж үйлдвэрийн яам, Хүнс хөдөө аж ахуйн яам, Хууль зүйн яам, Хүн амын хөгжил, нийгмийн хамгааллын яам, Эрчим хүчний яам, Гадаад харилцааны яам,  Боловсрол, соёл, шинжлэх ухааны яаманд боловсон хүчнээ ажлаас нь халсан, чөлөөлсөн асуудал байхгүй гэдгийг салбар хариуцсан сайд нар нь мэдэгджээ. Мөн МАН-аас томилогдсон сайд нартай уулзаж энэ талаар мэдээлэл авна гэдгийг АН-ын бүлгийн ахлагч Б.Гарамгайбаатар хэллээ.

Мөн тус нам 2015 оны үйл ажиллагааны төлөвлөгөөгөө боловсруулсан талаараа бүлгийн гишүүдэд мэдээлэл өгч, Эдийн засгийн өршөөлийн тухай хууль болон эдийн засгийн өршөөлийн тухай хуулийн талаар АН-ын бүлгээс ажлын хэсэг гаргахаар шийдвэрлэжээ.