Засгийн газраас явуулсан “2015-2016 онд хөгжлийн замаа хамтдаа сонгоё” санал асуулгын дүн гарлаа. Санал асуулгын дүнгээр "Оюутолгой болон бүтээн байгуулалтын том төслүүдийг шийдэх замаар ханшаа тогтоох" гэсэн замыг  169 мянга 230 иргэн буюу нийт оролцогчдын 56.1 хувийн санал авсан юм.

Санал асуулгын талаар Ерөнхий сайдын хэвлэлийн зөвлөх Ц.Мөнхтөрөөс тодрууллаа.

-Санал асуулга явуулахад хичнээн төгрөгийн зардал гарсан бэ?

-Үүрэн телефоны дөрвөн компани Засгийн газартай гэрээ байгуулсан. Тэгээд иргэд саналаа мессежээр илгээхэд үнэгүй байсан. Мөн дансандаа нэгжгүй иргэд ч саналаа илгээх боломжийг хангаж, бүх ажлыг үнэ төлбөргүй зохион байгуулсан. Харин систем болон үйл ажиллагааны зардлыг тухайн компаниуд нийгмийн өмнө хүлээсэн хариуцлага гэж хүлээн авч ажилласан.

-Хэд, хэдэн дугаар эзэмшдэг иргэд цөөнгүй байдаг. Тэгэхээр санал асуулгад оролцсон иргэдийн то давхардсан уу?

-4.2 сая орчим сим карт зах зээлд  зарагдсан байдаг. Үүнээс идэвхтэй хэрэглэгч болох 3.3 сая хүн рүү мессэж илгээсэн. Харин эдгээр хэрэглэгчид дунд өөр үүрэн телефоны компанийн хэд, хэдэн дугаар ашигладаг хэрэглэгч байж болно. Учир нь үүнийг ангилж зохицуулах эрх зүйн орчин байхгүй. Тэгэхээр гар утас ашигладаг хэрэглэгч бүрт энэ мессэж очсон гэсэн үг. Харин бид гадаадад байгаа буюу роүминг үйлчилгээг идэвхжүүлсэн хэрэглэгч, Монгол Улсад амьдарч байгаа гадаадын иргэд, өнгөрсөн сарын 26-наас энэ сарын 3-ны хооронд зарагдсан шинэ сим картнаас санал асуулгад оролцохыг хязгаарласан. Мөн интернэтээр санал аваагүй.

-Нэгдүгээр зам нь "Оюутолгой болон бүтээн байгуулалтын том төслүүдийг шийдэх замаар ханшаа тогтоох" гэсэн сонголт байсан. Оюутолгой эргэлтэд орсон байхад яагаад ийм сонголтыг тавих болсон юм бэ?

-Оюутолгойн ажил ерөнхийдөө зогсонги байдалд байгаа. Үүнийг дахин хэлэлцээрт орж, эргэлтэд оруулъя гэж байгаа юм. Мөн олон жил яригдсан ч эхэлж чадахгүй байгаа төслүүдийг яаралтай ажиллагаанд оруулъя гэсэн үг.

-Иргэд нэгдүгээр замыг сонгожээ. Харин Засгийн газраас яг энэ замыг барьж ажиллах уу?

-Иргэдийн хандлагыг судаллаа. Түүнээс биш яг үүгээр л явна гэсэн үг бас биш юм. Гэхдээ Засгийн газрын үйл ажиллагааны мөрийн хөтөлбөрт энэ чиглэлийг тусгах байх.