Улсын Их Хурлын Төсвийн болон Эдийн засгийн байнгын хороо өнөөдөр /2015.02.04/ хамтарч хуралдан Монгол Улсын Засгийн газар, Азийн хөгжлийн банк хооронд байгуулах зээлийн хэлэлцээрийн 2 төслийн талаар зөвшилцөн, санал, дүгнэлтээ Аюулгүй байдал, гадаад бодлогын байнгын хороонд хүргүүлэхээр тогтлоо.Байнгын хороодын хамтарсан хуралдаан 51.4 хувийн ирцтэй эхэлж, “Хөдөлмөр эрхлэх ур чадварыг дээшлүүлэх төсөл”-ийн зээлийн хэлэлцээрийн төслийн талаар хэлэлцэв. Зээлийн хэлэлцээрүүдийн танилцуулгыг Улсын Их Хурлын гишүүн, Засгийн газрын гишүүн Эрчим хүчний сайд Д.Зоригт хийв.
Тэрээр, хөдөө аж ахуй, барилга, зам тээврийн салбарын мэргэжлийн боловсрол сургалтын тогтолцоог хөдөлмөрийн зах зээлийн эрэлтэд нийцүүлэн сайжруулахад уг төслийн зорилго оршиж байна гээд төслийн хүрээнд МБСБ-уудыг орчин үеийн тоног төхөөрөмжөөр хангах, чадамжид суурилсан сургалт, үнэлгээний тогтолцоог бэхжүүлэн нутагшуулах, багш, удирдах ажилтнуудын чадавхжуулах тогтолцоог бүрдүүлэх, ерөнхий боловсролын сургуульд мэргэжлийн чиг баримжаа олгох, технологийн гүнзгийрүүлсэн сургалттай, бие даасан ахлах сургууль байгуулан сургалтын хөтөлбөрүүд боловсруулан хэрэгжүүлэх ажлууд хийгдэнэ хэмээв.
Мөн уг төслийг эхлүүлснээр сонгогдсон 20 МБС-ын байгууллагуудыг голлох ажил мэргэжлийн орчин үеийн тоног төхөөрөмж, сургалтын хэрэглэгдэхүүнээр хангаа болон 15 ажил мэргэжлийн стандарт, сургалтын хөтөлбөрүүдийг боловсруулж баталгаажуулан хэрэгжүүлэх юм. Багш болон үнэлээчдийг чадавхжуулах тогтолцоог бүрдүүлэн Үнэлгээний төвүүд байгуулагдана. Технологийн гүнзгийрүүлсэн сургалттай бие даасан 30 ахлах сургууль байгуулж, тоног төхөөрөмжөөр хангагдах юм байна.
Төслийн нийт өртөг нь 28.59 сая ам.доллар байх бөгөөд үүнээс 25 сая ам.долларыг Азийн хөгжлийн банкны хөнгөлөттэй зээлийн эх үүсвэрээр санхүүжүүлнэ. Зээл нь 25 жилийн эргэн төлөгдөх хугацаатай, үүнээс эхний 5 жилд нь үндсэн төлбөрөөс чөлөөлөгдөх ба жилийн 2 хувийн хүүтэй юм байна. Монгол Улсын Засгийн газар төсөл хэрэгжүүлэхэд 3.59 ам.долларын хөрөнгө оруулалт хийх шаарлагатай бөгөөд үүнээс 2.6 сая ам.доллар нь татвар хураамж болон магадлашгүй зардалд зарцуулагдана. Харин 0.99 сая ам.долларын санхүүжилтийг бараа үйлчилгээ хэлбэрээр гаргах юм. Төслийг 2015-2019 оны хооронд 4 жилийн хугацаанд хэрэлжүүлэхээр заажээ.
Танилцуулгатай холбогдуулан гишүүд ажлын хэсгээс асуулт асууж, зарим асуудлаар тодруулга авсан юм. Тухайлбал Ц.Нямдорж гишүүний энэ 2 зээлийн хэлэлцээрийг хийснээр өрийн тааз нэмэгдэх эсэх тухай асуултад Сангийн яамны өрийн удирдлагын хэлтсийн дарга н.Нарангэрэл хариулахдаа, Зээлийн хэлэлцээрийн талаарх яриа хэлэлцээ өнгөрсөн 8 сард хийгдсэн. Зээлийг авахад өрийн тааз нэмэгдэхгүй болохыг хэлж байсан.
Гишүүдийн асуулт асууж, саналаа ажлын хэсгийнхэнд дуулгасны дараа зээлийн хэлэлцээрийг зөвшилцөхийг дэмжье гэсэн саналын томьёоллоор санал хураахад хуралдаанд оролцсон 22 гишүүн санал нэгтэй дэмжиж хамтарсан хуралдаанаас гаргасан санал, дүгнэлтийг Аюулгүй байдал, гадаад бодлогын байнгын хороонд хүргүүлэхээр тогтсон.
Хуралдаанаар дараа нь “Дархан хотын бохир усны менежментийг сайжруулах төсөл”-ийн зээлийн хэлэлцээрийн төслийн талаар зөвшилцсөн юм. Уг зээлийг авч төслийг хэрэгжүүлснээр Дархан хотын төв цэвэрлэх байгууламжид шинэчлэл хийгдэх бөгөөд ус зайлуулах системийн 1.800 метр шугамыг сольж, хоёр насосны станцийн тоног төхөөрөмжийн хүчин чадлыг нэмэгдүүлэх юм.
Дархан хот Орхон-Сэлэнгийн сав газрын бүсэд, Хараа голын эрэг дагуу байрладаг экологийн эмзэг тогтоцтой тул өнөөгийн явуулж буй бохир усыг цэвэрлэх байгууламжийн ачаалал нэмэгдэхэд хүрээлэн буй орчны чанарын бууруулж, цаашид эрчимтэй доройтуулах эрсдэотэй нөхцөл байдал үүсээд байна. Иймд энэ асуудлыг шийдвэрлэх зорилгоор “Дархан хотын бохир усны менежментийг сайжруулах төсөл”-ийг Азийн хөгжлийн банкны 18.5 сая ам.долларын хөнгөлөлттэй болон энгийн эх үүсвэрийн зээлээр хэрэгжүүлэхээр төлөвлөжээ.
Уг төслийн нийт өртөг нь 20.68 сая ам.доллар байх бөгөөд үүнээс 18.5 сая ам.долларыг тус банкны зээлээр санхүүжүүлнэ. Зээлийн хөрөнгөөр хийгдэх энэхүү төсөл 2015-2019 онуудад хийгдэнэ. Дээрх зээлийн хэлэлцээрүүдийн төслийг Засгийн газрын хуралдаанаар хэлэлцэн дэмжсэн бөгөөд ийнхүү Улсын Их Хурлын холбогдох байнгын хороодоор хэлэлцүүлэн зөвшилцөхөөр оруулж иржээ.
Зээлийн хэлэлцээрүүдийн талаар М.Зоригт, Д.Дэмбэрэл, Б.Гарамгайбаатар, С.Ганбаатар, Ц.Баярсайхан, Г.Батхүү, С.Дэмбэрэл, Ц.Нямдорж нарын гишүүд ажлын хэсгээс асуулт асууж, үг хэлсэн юм.
Гишүүд зээлийн зориулалт нь тодорхой байгаа тул зээл авахыг дэмжиж байна гээд хэлэлцээ хийхийг зөвшөөрөх саналтай байгаа тухайгаа хэлж байсан. Ингээд санал хураахад гишүүдийн олонх дэмжиж санал, дүгнэлтийг Аюулгүй байдал, гадаад бодлогын байнгын хороонд хүргүүлэхээр шийдвэрлэсэн юм. Хуралдааны төгсгөлд Төсвийн байнгын хорооны дарга С.Болор тус байнгын хороо 15.30 цагт хуралдах болохыг мэдэгдээд Засгийн газраас Өрийн удирдлагын тухай болон холбогдох бусад хуулийн төслүүдийг татаж авсантай холбогдуулан хуралдааныг түр хойшлуулж, зарим ажлын хэсгийн дүгнэлт гарсны дараа хуралдахаар болсон тухай хэлсэн хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
