Монголын түүхэнд ард иргэдийн эсэргүүцэлтэй хамгийн их тулгарч буй Засгийн газраар Ч.Сайханбилэгийн Засгийн газар тодорч магадгүй байна. Үүнийг батлах нэг жишээ бол өдөр бүр зохион байгуулагдаж буй эсэргүүцлийн жагсаал цуглаанууд.

Түүнийг Засгийн эрхийг барьж эхэлснээс хойшхи хоёр сарын хугацаанд бараг өдөр өнжилгүй Чингисийн талбайд жагсаал цуглаан болов. 1990 оноос хойш трактор, буйдантай жагсаалаас эхлээд  тайван, ширүүн янз бүрийн цуглаан болж байсан ч нүд бүлтийлгэж, чих дэлдийлгэх бүр сэтгэл өвтгөм жагсаалуудыг энэ хоёр сард үзэх шив.

Өнгөрсөн хоёр сарын хугацаанд уул усаа хамгаалсан энгийн иргэдээс эхлээд эрдэмтэд, эмч багш нар, одонтой ээжүүд, ахмад настнууд, бөө зайран, трактортой тариланчид бүр өлгийтэй “хүүхдүүд” хүртэл жагсав. Уржигдар л гэхэд бөө нар Чингисийн талбайд онгод тэнгэрээ буулгана гэж ордныхныг сүрдүүлсэн бол өчигдөр тариаланчид трактортойгоо жагсаж арвай, буудайгаа талаар нэг цацаж “Тараадаг бус тарьдаг төр” байхыг шаардав. Удахгүй УИХ-ын гишүүн Г.Уянга тэмцэгч О.Магнай нар жагсахаар бэлтгэл ажилдаа орсон сурагтай. Тэд жагсаалдаа зориулаад дуу хүртэл зохиосноо олон нийтэд ил болгосон.

Ийнхүү хаврын синдром өвлийн эхэн сард эхэлж одоо ч үргэлжилсээр.

Ч.Сайханбилэг Ерөнхий сайд болсон даруйдаа ард түмний бүсийг чангалах бодлогыг танилцуулж олон нийтийн дургүйг хүргэсэн. Цаашлаад засгийн газраас эдийн засгийн хямралыг даван туулахын тулд зарим нэг хавтгайрсан халамжуудыг танана  хэмээн ширүүхэн мэдэгдсэн билээ. Тухайлбал, хүүхдүүд болон одонтой ээжүүдийн мөнгийг ялгавартай олгож төрсөн эхчүүдийн халамж, оюутны 70 мянган төгрөгөөс таналт хийнэ гэсэн. Мөн эрдэм шинжилгээний хүрээлэнгүүдийг татан буулгаж нэгтгэхээс эхлээд төрийн албан хаагчдыг 1500 аар цомхотгож багш, эмч нарын цалинг нэмэхгүй хэмээн Ерөнхий сайд хэлж байв. Түүний дээрх мэдэгдэл оюутнуудаас бусдынх нь дургүйг нь хүргэж орхисон. Хамгийн эхэнд эрдэмтэн, судлаачид жагсаж олон эрдэмтдийг гудамжинд гаргаж бүтээл туурвилыг маань хог дээр хаялаа хэмээцгээсэн.

Харин удалгүй эмч, багш нар жагсаж “Бид хүнд хүчир ажлыг хийдэг мөртлөө 400-500 мянган төгрөгийн цалин авдаг. Монгол улсын гол салбар болох Эрүүл мэнд, Боловсролын салбарт ажиллагчдын цалин олон жил бага байсаар ирсэн. Өнөөдөр салбартаа 10 аас дээш ажил ажилласан ахлах зэрэгтэй эмч 550 мянган төгрөгийн цалин авч байгаа. Маш их ачаалалтай мөртлөө хариуцлага өндөртэй ажлыг бага цалингаар хийж ирсэн нь мэргэжилдээ хайртайнх. Бидний цалинг нэм” хэмээн жагссан юм. Ингээд тэд үйлдвэрчний эвлэлтэйгээ хүч хавсарсны ачаар цалингаа нэмүүлж чадсан юм.
Тэдний араас одонтой ээжүүд тайван жагсаал хийж одонгоо буцааж өгнө хэмээн айлгасан. Ээжүүдтэй хамт УИХ дахь бие даагчдын бүлгээс эхлээд “Шударга ёс” эвсэл, МАН хүч түрж бас л уг шийдвэрийг буцаасан юм. Тэд олон хүүхэд төрүүлж өсгөсөн ээжийн хөдөлмөрийг нухчин дарж мөнгийг нь хасахыг зөвшөөрч чадахгүй гэсэн юм.

Ингээд удалгүй өлгийтэй “хүүхдүүд” /үзүүлэнгүүд/ жагсав. Ээжүүд хөхөө өвлийн хүйтэнд сандал дээр хүүхдүүдээ /үзүүлэнгүүдээ/ тавьж толгой дээр нь “С.Эрдэнэ ахаа, бид даарч байна. Гурван давхар дээлтэй та яаж байна. Ч.Сайханбилэг ахаа таны анхны ажил чинь нялх балчир бидний  хоолноос хумслах харгислал байсан гэжүү”  гэх мэтчилэн лоозон хадсан байсан.

Олон нийтийг эмзэглүүлсэн уг үйл ажиллагаа Монголын төрд чадах юм аа амлах хэрэгтэй гэх “хатуухан” сануулгыг өгсөн юм.
Үүнтэй зэрэгцээд интернэтэд жирэмсэн болон төрсний дараах тэтгэмжүүдээ хасуулахгүй гэсэн ээжүүдийн хэд, хэдэн групп нээгдэж Ерөнхий сайд Ч.Сайханбилэгийн утас руу уур, бухимдлаа илэрхийлсэн мессеж бичихээс эхлээд бөөн ажлыг ар, араас нь зохион байгуулав. Энэ мэт өнгөрсөн хугацаанд Ерөнхий сайд Ч.Сайханбилэг хар дарсан зүүд шиг орчинд хэцүүхэн ажилласан биз. Түүний Засгийн газар Ноён уулыг ухах шийдвэрийг УИХ-аар хэлэлцүүлж батлуулсан. Үүнийг эсэргүүцсэн бөө нар уржигдар Төрийн ордны гадна ноён уулыг ухуулахгүй хэмээн жагсаж онгод тэнгэрээ Чингисийн талбай дээр буулгаад улс төрчдийг хараана гэж сүрдүүлэв. Гэтэл ордны ойролцоох “Туушин” зочид буудал “Хаан гэр” рестораны барилгуудад гал гарч шатсаныг зарим хүмүүс дээрхтэй холбож ярьж эхэллээ.
 Ер нь Ч.Сайханбилэгийг уул, уурхайгаас мөнгө босгож эдийн засгаа өндийлгөх гэж байна ингэхдээ байгаль орчныг асар ихээр сүйтгэх бодлого баримталж байгаа хэмээн УИХ-ын зарим гишүүд ярьж байгаа. Тариалан эрхлэгчид хүртэл Төрөөс урамшууллаа нэхэж, Оросоос улаан будай импортлохыг хууль бус хэмээн трактортойгоо талбайд орж тариа будаагаа асгаж жагсав. Ер нь юу болоод байна даа. Энэ төр засгийн бодлого, үйл ажиллагаа бүр иргэдийн эрх ашгийг хөндөж буйг дээрх жагсаалуудаас харж болохоор байна. Уг нь иргэд төрөөс мөнгө гуйгаагүй. Улс төрчид өөрсдөө л нэг өглөө бөөн, бөөнөөр мөнгө амалж гарч ирсэн. Тэгээд халамжийн мөнгө ард түмний амьдралын салшгүй нэг хэсэг болсон хойно буцаан татах гэж буй нь олон нийтийн дургүйцлийг хүргээд байгаагийн гол илрэл энэ болж байна.

Төрд хандаж хэлэхэд "Чадах зүйлээ амалж бай".