УИХ-ын чуулганы хуралдаанаар ирэх хаврын чуулганаар хэлэлцэх хуулийн төслүүдийг хэлэлцэж байна. Хэлэлцэж буй асуудалтай холбогдуулан УИХ-ын гишүүд үг хэлж, асуулт асууж байна. Тухайлбал, УИХ-ын гишүүн Ж.Батзандан "Хаврын чуулганаар үндсэн хуульд өөрчлөлт оруулах хуулийн төслийг хэлэлцэх ёстой. Гэтэл хэлэлэх асуудлын жагсаалтад оруулж ирээгүй байна. Улс орны эдийн засаг хямарсан энэ хүнд үед Үндсэн хуульд өөрчлөлт оруулахаас өөр аргагүй. Учир нь Монгол улсад ганц эдийн засгийн хямрал бус улс төрийн хямрал ч бас нүүрлээд байна. Нэгдлийн дарга нарын баталсан Үндсэн хуулиар 23 жил явлаа. Мөн Үндсэн хуулийн цэцэд өөрчлөлт оруулах тухай асуудлыг хэлэлцэх ёстой. Ингэж байж хууль зөрчдөг, хулгай хийдэг намуудыг татан буулгана" гэлээ.
Мөн УИХ-ын гишүүн С.Бямбацогт Үндсэн хуульд өөрчлөлт оруулах ёстой гээд уг асуудлаар байнгын хороон дээр зарчмын зөрүүтэй санал хураалгасан байхад яагаад оруулж ирээгүй юм" гэлээ.
А.Бакей гишүүн тэдний асуултад хариулахдаа “УИХ дахь АН, МАН-ын бүлэг Засгийн газарт хамтрахдаа санамж бичиг байгуулсан. Уг бичигт үндсэн хуульд зохих хэмжээний өөрчлөлт оруулна гэдгийг тусгасан байдаг. Ингээд ажлын хэсэг гаргаад ажиллаж байгаа учраас жагсаалтад оруулахгүйгээр тус ажлын хэсгийн саналыг тухай бүрт нь шийдээд хэлэлцээд явж болно. Үндсэн хуульд өөрчлөлт оруулах хуулийн төслийг боловсруулчихавл тухай бүрт нь хэлэлцээд явахад бэлэн" гэлээ.
Харин УИХ-ын гишүүн Р.Амаржаргал салбар хариуцсан янз бүрийн бодлогын баримт бичгийг УИХ-аар бус яамдууд нь шийдвэл яасан юм бэ гэсэн санал хэлснийг төрийн байгуулалтын байнгын хорооны зүгээс дэмжээд цаашид тодорхой салбар нь хэлэлцүүлэх тал дээр анхааръя гэсэн юм.
Т.Энхэлээ
Сэтгэгдэл (5)