Монгол төрийн алтан жолоог 44 жил барьж удирдсан төр, нийгмийн нэрт зүтгэлтэн Юмжаагийн Цэдэнбал хэмээх агуу хүний туулсан амьдрал, гавъяа зүтгэл нь он цаг улиран одсон ч монголын ард түмний хувь заяатай амин судсаар холбоотой хэвээр байгаа билээ. Төр, түмнийхээ төлөө нэгэн үзүүрт сэтгэлээр хандаж бүхнээ зориулсан түүний хүнлэг энэрэнгүй, эх оронч зан төрхийг монголын ард түмэн үеийн үедээ хүндлэн дээдэлсээр байдаг юм. Учир нь монгол үндэстний ахуй амьдрал, шинжлэх ухаан, соёл, боловсрол, эдийн засаг сэргэн мандаж, Чингис хаанаас хойш мартагдсан монгол хүн дэлхий дахинд дахин танигдах боломжийг олгосон гавъяат хүний нэг бол яахын аргагүй Ю.Цэдэнбал билээ.
20-р зууны Монгол Улсын хөгжлийн гол суурийг тавихад ухамсарт амьдралаа бүхэлд нь зориулсан бөгөөд Монгол Улсынхаа тусгаар тогтнол, бүрэн эрхийг хадгалж үлдэхэд хамгийн гол нөлөө үзүүлсэн хүний нэг  нь Ю.Цэдэнбал. Тийм ч учраас 1961 оны 10 дугаар сарын 27-ны өдөр Нэгдсэн Үндэстний байгууллагад  Монгол Улсыг гишүүнээр элсүүлж, Монгол Улсын тусгаар тогтнолыг Дэлхий нийтэд хүлээн зөвшөөрүүлж чадсан юм.
Монгол Улс үеийн үед төр, улсынхаа төлөө зүтгэж явсан хүндээ халтай байсаар байна. Үүний нэгээхэн жишээ нь Монгол төрийг удирдаж явсан Ю.Цэдэнбал агсныг улс төрийн зорилгоор хэлмэгдүүлсэн явдал юм.
Төр, нийгмийн нэрт зүтгэлтэн түүний эх орондоо амьдрах эрхийг тухайн үеийн эрх баригчид бүдүүлгээр зөрчиж, гадаад оронд эмчилгээ хийлгүүлэх нэрээр Монгол Улсаас явуулж, нас барах хүртэл нь 7 жил хүний нутагт гэрийн хорионд байлгаж хүний эрхийг үл хүндэтгэж хэлмэгдүүлсэн билээ.
 Монголчууд бид Үндсэн хуулиндаа зааснаар, хүмүүнлэг, энэрэнгүй ардчилсан нийгмийг цогцлоон хөгжүүлэх, хүний эрх, шударга ёсыг дээдлэх ёстой атал Монгол Улсын 20 дугаар зууны хөгжилд томоохон гавъяа байгуулсан түүнийг өнөөдрийг хүртэл цагаатгаагүй байсаар байгаад монголын иргэн бүр харамсч цагаатгах талаар тодорхой шийдвэр гаргахыг хүлээсээр байна.
Монгол Улсын Цагаатгах ажлыг удирдан зохион байгуулах улсын комиссын даргын шийдвэрээр байгуулагдсан ажлын хэсгийн гишүүд “Монгол Улсын баатар, Монгол Улсын Хөдөлмөрийн баатар, Улсын Маршал Ю.Цэдэнбалыг улс төрийн талаар цагаатгах бүрэн үндэслэл байна” гэсэн дүгнэлтийг саяхан гаргажээ.
Иймд эрхэм хүндэт Монгол Улсын Ерөнхийлөгч, Улсын Их Хурлын дарга, Монгол Улсын Ерөнхий сайд, Төрийн түшээд та бүхэн Монгол төрийн нэрт зүтгэлтэн Юмжаагийн Цэдэнбал агсныг Монгол Улсын Цагаатгах ажлыг удирдан зохион байгуулах улсын комиссын ажлын хэсгийн дүгнэлтийг үндэслэн, мөн ард түмнийхээ итгэл, найдвар, хүлээлтийг хүндэтгэн үзэж, цагаатгах асуудлыг нэн даруй шийдвэрлэж өгөхийг хичээнгүйлэн хүсье.