УИХ-ын Төрийн байгуулалтын байнгын хорооны хуралдаанаар ЗГХЭГ-ын дарга С.Баярцогтыг огцруулах асуудлыг хэлэлцэх байсан ч МАХН-МҮАН-ын “Шударга ёс” эвслийн бүлэг ажлын тав хоногийн засварлага авлаа. Ингэснээр уг асуудлыг энэ сарын 18-ны өдөр хэлэлцэхээр болж байна. С.Баярцогтыг огцруулах хүсэлтийг УИХ-ын гишүүн С.Ганбаатар, Г.Уянга, Ц.Даваасүрэн, Л.Цог, Х.Болорчулуун нарын гишүүд гаргасан юм. Түүнийг 2015 оны төсвийн тодтголыг хэлэлцэх үед “Эрдэнэс Оюутолгой” ХХК АНУ-ын “Painter Law Firm” гэх хуулийн фирмээс зөвлөх үйлчилгээ авахдаа зарцуулахаар 17.5 тэрбум төгрөгийг төсөвт тусгаж үүнээс 450 орчим сая төгрөгийг нь урьдчилгаа хэлбэрээр олгосон нь татвар төлөгчдийн мөнгийг зориулалтын бус зүйлд зүй бусаар ашиглаж байна хэмээгээд УИХ-ын гишүүн С.Ганбаатар, Х.Болорчулуун, Ц.Даваасүрэн, Г.Уянга, Л.Цог нар огцруулах саналыг УИХ-д өргөн барьсан юм.
Харин С.Баярцогт “Шударга ёс эвслийн бүлэг завсарлага авч байгаад их харамсаж байна. Танай бүлэг хувь хүний нэр хүндэд бүдүүлгээр халдчихаад одоо завсарлага яагаад авч байгаа юм. Цагаан дээр хараар биччихсэн зүйлийг судлаагүй байж одоо судална гэж буй нь Л.Цог, Г.Уянга гишүүд буруугаа мэдээд уучлалт гуйх гэж байна гэж ойлголоо. Би ёс зүйн хороо, хууль шүүхийн байгууллагад хандана” гэлээ.
Түүний хэлсэн үгийг бүрэн эхээр нь удахгүй хүргэх болно.
Т.Энхэлээ
Сэтгэгдэл (40)