Ерөнхий сайд Ч.Сайханбилэг өнгөрсөн сарын сүүлээр Олон улсын валютын сан рүү “Манайд ирж” ажиллаач гэх хүсэлтийг явуулсан.

www.24tsag.mn Ерөнхий сайд Ч.Сайханбилэгийн Кристин Лагардад хаягласан захидлыг бүрэн эхээр нь хүргэж байна.

Захидалд:

Сүүлийн жилүүдэд гарсан Монголын эдийн засгийн хүчтэй өсөлт нь гадаад орчны тусгүй нөлөө болон дотоодийн идэвхгүй байдлын улмаас удаашраад байна. Засгийн газар өнөөгийн эдийн засгийн уналтад нөлөөлж буй сөрөг хүчин зүйлсийн нөлөөг багасгахыг оролдож байгаа бөгөөд цаашдаа удаан хугацаанд хөгжих тогтвортой арга замыг батлахаар хичээж байна.

Санхүүгийн болон мөнгөний бодлогын уялдаа холбоо, бусад бодлогуудын уялдааг зохистой шийдлийн түлхүүр хэмээн үзэж байна. Монголын хөгжлийн төлөө бодлогын шинэчлэлийг амжилттай хийх шаардлагатай хэмээн итгэж байна.

Дээрх бодлогын шинэчлэлийг хэрэгжүүлэхийн тулд Олон улсын валютын сантай албан ёсны хэлэлцээ хийх хүсэлтэй байна. Үүнээс гадна Олон улсын валютын сангийн ажлын хэсгийн төлөөлөгчдийг Монголд урьж дээрх асуудлаар хурдан шийдэлд хүрх хүсэлтэй байна.

Ч.Сайханбилэг Эдийн засгийн хямралаас гарах арга замуудын нэгийг Олон улсын валютын сангийн Стэндбай хөтөлбөрт хамрагдах гэж үзэж байгаа. Түүнд тус зөвлөгөөг Эдийн засгийн бодлогын зөвлөх О.Чулуунбат нь санал болгосон гэдэг. О.Чулуунбатын хувьд "Монголын төр засгийн зүгээс Хятадын банк /Bank of China/-ны салбарыг нээх зөвшөөрлийг олгох, удаах нь ОУВС-ийн "Стэндбай" хөтөлбөрт хамрагдах. Үүнээс өөр эдийн засгийн хямралаас сэргийлэх ашигтай гарц харагдахгүй байна гэж" ярьж яваа.

Ямартай ч Ерөнхий сайд зөвлөхийнхөө үгэнд орж Стэндбай хөтөлбөрт хамрагдахаар шийдэж дээрх захидлыг явуулжээ.  Тэгвэл “Монголд Стэндбай” хэрэггүй гэж эдийн засагчид ярьж эхэллээ. Стэнбай хөтөлбөрийг ОУВС-аас эдийн засгийн хямралд орсон орнуудад зориулан хэрэгжүүлдэг бөгөөд  богино хугацааны гал унтраах төслүүдэд зориулсан зээлүүдийн нэг  юм.

Бид тус хөтөлбөрт хамрагдвал төсөв, мөнгөний бодлогоо ОУВС-ийн зөвлөснөөр өөрчилж, шууд гадны хараат байдлаар асуудлыг шийдэж эхэлнэ. Жишээлбэл иргэдэд өгч буй бүх нийгмийн халамжийг бууруулах болон бүр мөсөн зогсоох. Үүнд нөгөө хүүхдийн мөнгө, одонтой ээжүүдийн мөнгө, тариа буудай, ноос ноолуурын урамшуулал гэх мэт халамжийн бодлогууд орно. Дараа нь гадаадын хөрөнгө оруулагчдад хандсан маш уян хатан, нээлттэй бодлого барихыг үүрэг болгоно. Энэ бол нөгөө л газрын доорх баялаг руу шунахай сувдаг сэтгэлтэй гадны хар сэтгэлтнүүдийг вагон, вагоноор нь оруулах далд санаархал. Энэ хамгийн аюултай шахалт юм. Мөн төрийн өмчийн бүхий л онцгой обьект, барилга байгууламж, дэд бүтцийн чухал салбаруудийг ч хүртэл хувьчлахыг шаарддаг. Энэ заалтын цаана үндэстэн дамнасан томоохон компаниудын мөнгөтэй эрхмүүд нөлөөллөө тогтоож эхэлдэг.

Бүр тодруулбал, Монгол Улсын Засгийн газар ОУВС-аас хүсээд байсан зээлээ авлаа гэхэд дээр өгүүлсэнчлэн цаашид өөрийн эдийн засгаа хүссэнээрээ удирдан залж чадахгүй, зөвхөн өгөгдсөн зааврын дагуу олон улсын байгууллагуудын төлөөлөгчдийн хяналтын дор эдийн засгийн бодлогоо хэрэгжүүлэх гарцаагүй тулган шаардалттай учирч болзошгүй. Улмаар энэ мэт байдал нь даамжирсаар улс орны эдийн засгийн бие даасан хараат бус байдлыг алдагдуулах аюулд хүргэх тухай судлаачид сануулж байна.

Товчхондоо, Монгол шиг байгалийн баялаг, түүхий эдийн нөөц ихтэй ч хоцронгуй хөгжилтэй улсыг дэлхийн том компаниуд өөрийн болгох арга Стэндбай хөтөлбөрийн ард нуугдаж буй.