УИХ-ын чуулганаар яг одоо Ашигт малтмалын тухай хуульд нэмэлт оруулах тухай хуулийн төслийг хэлэлцэж байна. Засгийн газраас өргөн барьсан уг хуулийн төслийн талаар гишүүд асуулт асууж байна. Энэ үеэр УИХ-ын гишүүн Ц.Даваасүрэн ингэж асуусан юм.

УИХ-ын гишүүн Ц.Даваасүрэн: Монголыг хувьгүй болгож байгаад зарвал үнэтэй зарагдана. Ингэж гадаадын гар хөл болохоо зогсоо. Ард түмнээсээ асууж байна гээд байгаа юм. Их муухай. Тэр нөгөө зөвлөгөө л яваад байх шиг байгаа юм. Та нар өлсөх үү, хөдөлцөн Оюутолгойгоо дахиж хөдөлгөх үү гээд байна. Хилийн цаана гаргаж хөдөлгөх үү гэж асууж байгаа юм. Одоо юу гэж хэлэх вэ гэхээр Оюутолгойгоо хилийн цаана гаргаж хөдөлгөлөө гэх хэлэх гэж байна. Оюутолгойн 34 хувийг нөөц ашигласны төлбөрөөр солино гэсэн заалт байна. Арай л хэтэрч байна шүү дээ. Ер нь уул уурхайгаа зөв ашигласан Чили, Норвеги зэрэг орнууд бүгд орд газруудаа дандаа төрийн өмчиндөө байлгасан. Тэд баялагаа тооцож хувиа 50 хувь болгож байна. Харийхан өнөөдөр манайх руу буу, зэвсэг барьж ирэхгүй. Бидний өмчийг л худалдаал авчихна. Тэднийг яах юм бэ, хөөж явуулж болохгүй. Яагаад ингээд Монголыг дуусгах гээд байгаа юм бэ. Эдийн засгийн аргаар яагаад Монголыг сөнөөх гээд байгаа юм бэ. Стратегийн ордууд бидний эдийн засгийн аюулгүй байдалд нөлөөлөх чухал орд. Энэ зүйлээ зогсоо. Энэ муухай юмыг хийж болохгүй. Гадаадынхан чинь бидний гараар ийм зүйл хийлгэх гээд байна. Төрдөө хувь эзэмшүүлэхгүйгээр төрөө муу, харийхан сайн гээд сууж байж болох уу. Би үүнийг сайн ойлгохгүй байна. Их хурлын гишүүд үүнийг сайн анхаараарай. Сүүлдээ ард түмний тэвчээр алдагдах вий дээ. Ард түмний нэрийг барьж санал асуулга хийж байна.

Түүний асуусан асуултад ЗГХЭГ-ын дарга С.Баярцогт ийнхүү хариулсан юм. Тэрээр "Ц.Даваасүрэн гишүүн бүр паранойятой /Сэтгэцийн өвчин/ болчихсон юм шиг байна. Ерөнхий сайд, Уул уурхайн сайд Р.Жигжид нар Япон улсад ажлын айлчлал хийж байгаа учраас хэн нэгэн сайд нь төлөөлж илтгэлийг нь унших үүрэгтэй юм. Ц.Даваасүрэн гишүүнээ та бол шинээр сонгогдсон гишүүн биш. Та хоёр дахь удаагаа сонгогдсон. Урд нь төрийн яаманд  ажиллаж байсан. Одоо наад паранойягоо зогсоо. Ингэж популизм хийж байж дараагийнхаа улс төрийн орон зайг олж авна гэж бодож байвал ард түмэн таныг тун удахгүй танина. Тийм юм хийдгээ боль. Одооны оруулж ирж буй асуудал бол сонголт хийх талаар л яригдаж байна. Түүнээс биш төрийн хувиа байхгүй болгоё гэсэн асуудал ерөөсөө биш. Юмыг ингэж муйхарлаж тайлбарладагаа боль. Орд болгон дээр тусдаа. Наадах чинь 15 орд дээр л яригдаж байгаа зүйл. Батлах эсэх эрх нь УИХ-д л байгаа. Ийм байдлаар асуудлыг шийдэж болно гээд мэргэжлийн яам нь оруулж ирсэн хэрэг. Түүнээс биш нэг хувь хүнтэй холбож тайлбарлаад, түүгээрээ амьдарна гэж байгаа бол улс төр тэгж явдаггүй юм" гэлээ.

Харин УИХ-ын гишүүн Ц.Даваасүрэн: Би С.Баярцогт, Ч.Сайханбилэг хоёрт хандаж нэг үг хэлье. УИХ-ын гишүүн ард түмний төлөөлөл байдаг юм. Ард түмнээ төлөөлж үг хэлэхийг хуурамч хайр, популизм гэж болохгүй. Та нар тэгж хэлж чадахгүй. Та нар гадныханы гар хөлүүд. Тэртээ тэргүй ард түмэн шүүнэ. Амьдрал шүүнэ. Чи харж л байгаарай шүүнэ"