УИХ-ын чуулганы хуралдаанаар Гацууртын ордын төрийн эзэмшлийн хувь тогтоох тухай УИХ-ын тогтоолын төслийн хэлэлцэх эсэхийг хэлэлцлээ. Энэ үеэр гишүүдийн хэлсэн үгийг тоймлон хүргэж байна.

Тогтоолын төсөлд Гацууртын ордын тусгай зөвшөөрлийг эзэмших компанийн 20 хувийг төр эзэмшинэ гэж заасан. Уг хувь хэмжээг стратегийн ордын ашигт малтмалын нөөц ашигласны тусгай төлбөрөөр орлуулах хувилбарыг санал болгож, тохиролцохыг Засгийн газарт үүрэг болгосон хэмээн ЗГХЭГ-ын дарга С.Баярцогт хэлж байгаа юм.


-УИХ-ын гишүүн Х.Болорчулуун, Хараа гол руу цутгадаг дөрвөн гол Ноён уулаас эх авдаг. Гэтэл алт олборлох ашиглалтын талбай дээрх дөрвөн голтой тун ойрхон байгаа. Хэрэв Хараа гол ширгэхэд хүрвэл хариуцлагыг хэн хүлээх вэ?

-Уул уурхайн дэд сайд Г.Тэмүүлэн, Байгаль орчны нарийвчилсэн үнэлгээ хийсэн. Хуулийн дагуу ашигт малтмалын лиценз эзэмшигч нь нөхөн сэргээлт хийх, соёлын өвийг хамгаалах ёстой.

-УИХ-ын гишүүн С.Ганбаатар, "Сентерра гоулд" компани Гацууртын ордод хэдэн төгрөгийн хөрөнгө оруулалт хийх вэ?

-Уул уурхайн дэд сайд Г.Тэмүүлэн, Нийт 300 сая ам.долларын хөрөнгө оруулалт хийнэ.

-УИХ-ын гишүүн Г.Уянга, Гацууртын ордны үндсэн үнэ хэд вэ. Энэ ордыг ашиглахгүй байх нь зөв юм биш үү?

-Уул уурхйн дэд сайд Г.Тэмүүлэн, "Сентерра гоулд" компани 10 жилийн хугацаанд гурван их наяд төгрөгийн борлуулалт хийнэ. Тэгээд нөөц ашигласны тусгай төлбөрт 659 тэрбум төгрөг төлнө. Мөн Монгол ажилчдын цалин, худалдан авалт зэрэг тодорхой хэмжээний хөрөнгө оруулалт хийнэ. Ингэснээр нийт Монгол Улсад нийт 1.9 их наяд төгрөгийн хөрөнгө оруулалт хийнэ гэж тооцоолж байна.

Хэлэлцүүлгийн шатанд УИХ-ын гишүүн, “Шударга ёс” эвслийн бүлгийн дэд дарга З.Баянсэлэнгэ ажлын тав хоногийн завсарлага авах хүсэлт тавьсныг УИХ-ын дарга З.Энхболд хүлээн авлаа.