УИХ-ын чуулганы нэгдсэн хуралдаанаар Улсын Ерөнхий Прокурорыг томилох саналыг зөвшилцөх тухай асуудлыг хэлэлцэн, гишүүдийн 90.6 хувийн саналаар дэмжлэг хүлээн баталлаа.

Монгол Улсын Ерөнхийлөгчөөс М.Энх-Амгаланг Улсын Ерөнхий Прокуророор томилуулах саналыг зөвшилцөхөөр өчигдөр УИХ-д өргөн мэдүүлсэн юм.

 Улсын Ерөнхий Прокуророор томилогдсон М.Энх-Амгалангийн товч намтар:

 1963 онд Улаанбаатар хотод төрсөн. 1971-1981 онд Ерөнхий боловсролын 11 дүгээр сургууль, 6 дугаар сургуульд тус тус суралцаж, 1982-1987 онд Зөвлөлт Холбоот Улсын Мөрдөн байцаах дээд сургуульд хууль зүйн бакалавр, 2003 онд Оросын Холбооны Улсын МКСВУЗ-д хууль зүйн магистрын зэргийг тус тус эзэмшсэн. Дээд боловсролтой. Эрх зүйч мэргэжилтэй юм байна. Тэрээр 1987-1988 онд Хөвсгөл аймгийн Цагдан сэргийлэх ангийн мөрдөн байцаагч, 1988-1991 онд Улаанбаатар төмөр замын Цагдан сэргийлэх ангийн мөрдөн байцаагч, 1991-2008 онд Улсын Мөрдөн байцаах газарт ахлах мөрдөн байцаагч, хэлтсийн дарга, газрын дарга, 2008-2012 онд Цагдаагийн ерөнхий газарт дэд даргаар тус тус ажиллаж байжээ.