Чуулганы өнөөдрийн /2015.02.13. Баасан гараг/ үдээс хойших хуралдаанаар “Эдийн засгийн хүндрэлийг даван туулах арга хэмжээний тухай” Улсын Их Хурлын тогтоолын төслийг /Засгийн газар, 2015.02.06-ны өдөр өргөн мэдүүлсэн/ хэлэлцэх эсэх асуудлыг хэлэлцлээ.

Хууль санаачлагчийн илтгэлийг Монгол Улсын сайд, Засгийн газрын Хэрэг эрхлэх газрын дарга С.Баярцогт, Эдийн засгийн байнгын хорооны санал, дүгнэлтийг Улсын Их Хурлын гишүүн Ж.Батсуурь, Улсын Их Хурал дахь Ардчилсан намын бүлгийн санал, дүгнэлтийг Улсын Их Хурлын гишүүн Б.Гарамгайбаатар, Монгол Ардын намын бүлгийн санал, дүгнэлтийг Улсын Их Хурлын гишүүн С.Бямбацогт нар танилцуулав.

Тогтоолын төсөлд хөтөлбөрийг макро эдийн засгийг тогтворжуулах болон эдийн засгийн өсөлтийг дэмжих гэсэн хоёр үндсэн чиглэлийн хүрээнд хэрэгжүүлэхээр төлөвлөсөн байна. Хөтөлбөрийн зорилт, арга хэмжээ тус бүрийг богино хугацаанд үр дүнгээ гаргах, дунд хугацаанд үр дүнгээ гаргах арга хэмжээнүүд гэж ангилан тусгажээ. Тогтоолын төсөлд нийт 74 арга хэмжээг хамруулахаар төлөвлөж байгаагаас макро эдийн засгийг тогтворжуулах бодлогын хүрээнд төсвийн бодлогыг сайжруулах, санхүүгийн тогтвортой байдлыг дээшлүүлэхэд чиглэсэн мөнгөний бодлого хэрэгжүүлэх, нийгмийн халамжийн бодлогыг зорилтот бүлэгт чиглүүлэх замаар эмзэг бүлгийг хамгаалах зэрэг арга хэмжээг тусгах бол эдийн засгийн өсөлтийг дэмжих бодлогын хүрээнд гадаадын хөрөнгө оруулалт болон экспортыг нэмэгдүүлж, импортыг орлох дотоодын үйлдвэрлэлийг дэмжих, бизнесийн орчныг сайжруулах зэрэг арга хэмжээг тусгахаар төлөвлөсөн байна. Мөн эдийн засагт орж ирэх гадаад валютын урсгалыг нэмэгдүүлэх замаар төлбөрийн нийт тэнцлийн алдагдлыг бууруулж, хувийн хэвшилд ирэх ачааллыг зөөлрүүлж, ажлын байрыг хамгаалахаас гадна дунд хугацаанд эдийн засгийн тогтвортой өсөлтийн суурийг бэхжүүлэх, эдийн засгийн бүтцийн шинэчлэл хийх зэрэг үндсэн чиглэл, цогц арга хэмжээг авч хэрэгжүүлснээр манай улсын эдийн засагт учрах сөрөг нөлөөллийг багасгах, хямралт бйдлыг эрсдэл багатайгаар даван туулах зэрэг эерэг ач холбогдолтой гэж үзжээ.

Хууль санаачлагчийн илтгэл болон байнгын хорооны санал дүгнэлттэй холбогдуулан Улсын Их Хурлын гишүүн Д.Батцогт, О.Баасанхүү, Д.Ганхуяг, Ц.Даваасүрэн, Д.Сарангэрэл, Ж.Батзандан, Г.Уянга, С.Дэмбэрэл, Ё.Отгонбаяр, Б.Гарамгайбаатар, С.Бямбацогт, А.Тлейхан нарын тавьсан асуулт, тодруулгад Монгол Улсын сайд, Засгийн газрын Хэрэг эрхлэх газрын дарга С.Баярцогт, Сангийн сайд Ж.Эрдэнэбат, Монголбанкны Тэргүүн дэд ерөнхийлөгч Б.Жавхлан нар хариулт өглөө.

Мөн тогтоолын төслийг цаашид сайжруулаад явах нь зүйтэй гэсэн байр суурьтай байгаагаа илэрхийлж Улсын Их Хурлын гишүүн Ц.Нямдорж, С.Бямбацогт, Ё.Отгонбаяр нар үг хэлсэн бол тунхагийн шинж чанартай материал оруулж ирж байгаа нь цаашаа явахгүй, урд нь гаргасан хууль, тогтоомжуудаа Засгийн газар эрчимтэй хэрэгжүүлэхэд анхаарч ажиллах ёстой. Улсын Их Хурал орж ирсэн дийлэнх хууль, тогтоомжийг баталж өгч байгаа. Хямралын суурь олон жилийн эхтэй. АН-ын эдийн засаг, МАН-ын эдийн засгийн хямрал, олонх цөөнхийн эдийн засгийн хямрал гэж байхгүй гэсэн шүүмжлэлийг Улсын Их Хурлын гишүүн Р.Гончигдорж, Г.Уянга, Д.Ганхуяг нар хэлсэн юм. Ингээд байнгын хорооны саналаар “Эдийн засгийн хүндрэлийг даван туулах арга хэмжээний тухай” Улсын Их Хурлын тогтоолын төслийг хэлэлцэх нь зүйтэй гэсэн саналын томьёоллоор санал хураалт явуулахад хуралдаанд оролцсон 53 гишүүний 35 нь буюу 66 хувийн саналаар тогтоолын төсөл дэмжигдлээ. Ингэснээр тогтоолын төслийг анхны хэлэлцүүлэгт бэлтгүүлэхээр Эдийн засгийн байнгын хороонд шилжүүлэв. Чуулганы хуралдаан цаг сунган үргэлжилж байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.