Ардчилсан нам дотор шинэ фракц байгуулагдсан талаар бид өмнө нь мэдээлсэн. Тус фракцийг УИХ-ын гишүүн Л.Болд, Ш.Түвдэндорж, Ц.Оюунгэрэл, Г.Батхүү, А.Бакей нар байгуулсан билээ.

Чухам ямар шалтгаанаар шинэ фракц байгуулсан талаараа тэдний зарим нь доорх тайлбарыг хийлээ.

Тодруулбал, УИХ-ын гишүүн Л.Болд “Монголын ардчилал дэлхийн ардчиллын үнэт зүйлсийг тусган авч, өөрийнхөө үндэсний үнэт зүйлстэй хослуулж чадсан. Бидэнд дэлхийн бүхий л ардчилсан орны иргэдэд нээлттэй байдаг хүний эрх, эрх чөлөө, хувийн өмч, чөлөөтэй зорчих эрхийг өгч чадсан. Гэвч өнөөдөр энэхүү үнэт зүйлийнхээ эсрэг, хувийн өмчинд халдах, бизнес эрхлэгчдийг дарамтлах хөдөлмөрөөрөө хөрөнгөжсөн хэсгээ хавчин гадуурхах, энэ мэт ажиллагаанд төрийн зүгээс тодорхой хэмжээнд нөлөөлөх байдал бий болж байгаад эмзэглэж буй юм. Ийм ч учраас ардчилсан хувьсгалаар зорьж, тэмцэж олсон үнэт зүйлсээ хамгаалах шаардлага зүй ёсоор тавигдаж байна. Энэ зорилгод нэгдсэн АН-ын нэр бүхий гишүүд МоАН санаачилгыг гаргасан юм” гэжээ.

Нэг үгээр хэлбэл, АН-ын одоогийн фракцуудын алинд нь ч ардчилалын үнэт чанар байхгүй болсон учраас тэд өрх тусгаарласан гэнэ.

Тиймээс Ардчиллын үнэт зүйлсийг хамгаалан бэхжүүлэх, түгээн дэлгэрүүлэх чиглэлээр үйл ажиллагаа хэрхэн явуулах талаар эдгээр гишүүд ярилцсаны эцэст ийм шийдвэрт хүрчээ.

Тус фракцфын гишүүн Ц.Оюунгэрэл энэ талаар “Монголын Ардчилал бол ард түмнийхээ хүсэл зоригоор Монголдоо төрж, бойжиж, бэхжсэн үндэсний үнэт зүйл бөгөөд түүний зайлшгүй хамгаалах ёстой үнэт өв нь хүний эрх, эрх чөлөө, хүмүүнлэг, иргэнлэг зарчим гэж МоАН санаачилгынхан үзэж байгаа юм” хэмээжээ.

Тэгэхээр Ардчилал утгаа алдсан одоогийн байдлыг халах алхмыг тэд хийх юм байна. Чухам тус фракцынхан амалсандаа хүрч ажиллах эсэхийг цаг хугацаа харуулах биз.  

Мөн МоАН санаачилгыг АН-ын Үндэсний Зөвлөлдөх хороо, Гүйцэтгэх зөвлөл болох бүх шатны байгууллагын олон гишүүд дэмжин нэгдэж эхэлжээ.