Сүүлийн үед МАН-ынхан Засгийн газрынхаа шийдвэрийн эсрэг сөрж ажиллаж байгаа. Үүнийг тус намын эрх бүхий албан тушаалтнуудын шил дараалсан мэдэгдлээс харж болно. Хамгийн сүүлд л гэхэд тус намын Ерөнхий нарийн бичгийн дарга Ж.Мөнхбат МАН Засгаас гарна гэсэн утгатай зүйлийг хэвлэлд өгсөн ярилцлагадаа дурдсан. Ер тус намын бүлэг “Эдийн засгийн хүндрэлээс хамтарч гаргаж чадна” гэчихээд хамтрагчаа муулж, популизм хийж явааг иргэд шүүмжилж эхэлсэн.

 Тухайлбал салбарын сайд нь “Нийгмийн хамгааллын чиглэлээр нөхцөл байдал амаргүй байна. Цалин, тэтгэвэр үний өсөлтөөсөө асар их хоцорч байна. Энэ бүхэн улс орныг буруу бодлогоор хөтөлсөн АН-ын буруу” хэмээн шүүмжилсэн. Тэгвэл тус намынхны энэхүү зан нь АН-ын зарим гишүүдэд таалагдахгүй байгаа бололтой. Уг асуудлаар тус нам бүлгийн хурал дээрээ ч ярилцсан сураг байна.

АН-ын гишүүд МАН-ыг эдийн засгийн хямралаар улс төр хийж байна. Уг нь хямралаас гарахын тулд хамтарч ажиллана гэсэн. Гэтэл МАН Засагт орж өөрсдийн хүнийг шургуулж, АН-ын хүчийг сулруулчихаад удахгүй Засгаас гарах бэлтгэлээ базааж байна. 2016 оны сонгуулийн пиараа ч хийгээд эхэлчихлээ. Тиймээс хариуцлага ярих ёстой. Зарим сайдыг нь огцруул гэжээ. Бүр МАН-ын зарим сайдыг огцруулах гарын үсэг цуглуулах санаачилга гарсан сурагтай.