МАН-ын бүлэг өнөөдрийн хуралдаанаараа Өрийн удирдлагын тухай хууль болон Цалин, тэтгэврийн зээлийн хүүг бууруулах арга хэмжээний талаар хэлэлцэж бүлгийн байр сууриа нэгтгэжээ. Мэдээллийг бүлгийн дэд дарга Н.Номтойбаяр, УИХ-ын гишүүн Д.Хаянхярваа нар өглөө.

Тус бүлэг Өрийн удирдлагын тухай хуулийг сайн судалж байж батлах ёстой гэж үзжээ.  Энэ талаар УИХ-ын гишүүн А.Хаянхярваа хэлэхдээ “Монгол улсын өрийн хэмжээг тус хуультай холбож үзэж байгаа. Тиймээс уг хуулийг хэлэлцэхдээ хөнгөн хуудамгай хандаж болохгүй. Эдийн засагт чухал нөлөө үзүүлэх хууль учраас нилээн нухацтай судалж, ажлын хэсгүүд санал дүгнэлтээ зөв гаргах ёстой гэж үзсэн. Тэгэхээр уг хуулийг богино хугацаанд яарч батлах хэрэггүй гэдэг зарчмын саналд нэгдсэн. МАН-ын бүлэг уг хуулийн төслийг ирэх лхагва гариг хүртэл илүү сайн судалж, ажлын хэсгийн дүгнэлтийг сонсохоор шийдсэн” гэлээ.

Мөн тус хуулийг баталбал Засгийн газар 3-4 триллон төгрөгийн зээл нэмж авах боломж бүрдэх юм байна. Харин өрийг хэрхэн, яаж барагдуулах нь тодорхойгүй байгаа учраас уг асуудлыг дахин сайн ярилцаж, зөв шийдвэр гаргах ёстой гэж тус бүлэг үзжээ.

Бүлгийн хурлаар хэлэлцсэн дараагийн асуудал нь Н.Номтойбаяр, О.Содбилэг нарын нэр бүхий гишүүдийн санаачилсан Цалин, тэтгэврийн зээлийн хүүг багасгах хуулийн төсөл байна.

Уг хуулийг хэрэгжүүлэх бүрэн боломжтой гэж тус бүлэг үзсэн байна. Энэ талаар Н.Номтойбаяр гишүүн ярихдаа “Сүүлийн хоёр жилд цалин болон тэтгэврийн зээл авсан хүмүүсийн тоо 40 хувиар нэмэгдсэн байна. Тодруулбал 190 мянган ахмад настан тэтгэврийн зээл авсан байна. Мөн 260 мянган залуус цалингийн зээл авчээ. Чингис бонд, Нийгмийн даатгалын сан болон Эрсдлийн сангийн үлдэгдлүүдийг арилжааны банкуудад бага хүүтэйгээр байршуулдаг. Төрийн мөнгийг бага хүүтэйгээр байршуулж байгаа мөртлөө эргүүлээд иргэдэд өндөр хүүтэйгээр зээлж байгаа. Жишээ нь Нийгмийн даатгалын сангийн 600 гаруй тэрбум төгрөгийн үлдэгдэл байна. Энэ мөнгөнүүд үхмэл байдалтай байгаа. Тиймээс уг мөнгийг гэрээнд өөрчлөлт оруулах замаар цалин болон тэтгэврийн зээлийн хүү рүү шилжүүлж асуудлыг шийдэх боломж байгаа юм” гэлээ.

Энэ асуудлаар Засгийн газарт тодорхой шаардлага тавьж олон нийтийн дунд хэлэлцүүлэг өрнүүлэхээр болжээ.