Засгийн газрын өчигдөрийн хуралдаанаар хуучнаар Төрийн тусгай албан хаагчдын эмнэлгийг нэгдсэн эмнэлэг болгох шийдвэрийг гаргажээ. Тус эмнэлгийг өмнөх Засгийн газар Хууль зүйн яаманд харьяалуулж, оффисын зориулалттай болгосон байсан билээ. Энэ талаар Эрүүл мэнд, спортын сайд Г.Шийлэгдамбаас тодрууллаа.

-Төрийн тусгай албан хаагчдын эмнэлгийг нэгдсэн эмнэлэг болгох шийдвэр гаргасан байна. Хэдэн ортой, ямар хүчин чадалтай эмнэлэг бий болох вэ?

-Тус эмнэлгийн барилгыг Хууль зүйн яамны харьяанд шилжүүлж, конторын зорилгоор ашиглах шийдвэр гаргасан байсан. Засгийн газрын өчигдөрийн хуралдаанаар эмнэлгийн барилгыг Эрүүл мэнд, спортын яамны харьсанд шилжүүлж нэгдсэн эмнэлгийн зориулалтаар 260-аас доошгүй ортой эмнэлэг болгон барьж ашиглах шийдвэр гаргалаа. Тус барилгыг менежментийн гэрээгээр орчин үеийн стандартад нийцсэн нэгдсэн эмнэлэг болгох юм. Нэгдсэн эмнэлэг дотроо хүүхэд, мэс засал, эмэгтэйчүүд, төрөх гэх мэт бүх төрөлжсөн тасгуудыг нэг дор төвлөрүүлнэ. Гэхдээ энэ эмнэлэг дотроо, төрийн тусгай албан хаагчдад үйлчилгээ үзүүлэх ажиллагааг нь давхар харьяалуулна.

-Барилгын зориулалтыг өөрчлөхөд хэдэн төгрөг шаардлагатай вэ?

-20 гаруй тэрбум төгрөг шаардлагатай. Эргэн төлөгдөх нөхцөлтэйгөөр менежметийн багыг I эмнэлгийн хүнийн нөөцийн үйл ажиллагаан дээр тулгуурлаж хэрэгжүүлэх чиглэлтэй байгаа.

-Ашиглалтад хэзээ орох вэ. Анхнаасаа эмнэлгийн зориулалтаар баригдсан барилгыг, өөрчлөхөд яагаад ийм өртөг өндөртэй байгаа вэ?

-20 гаруй тэрбум төгрөгийн тооцоог бид хийж Засгийн газрын хуралдаанд танилцуулсан. Энэ мөнгө нь стандартын дагуу эмнэлэг болгох барилгын засвараас гадна, тоног төхөөрөмж гээд шаардлагатай бусад бүх зардалууд орж байгаа. Энэ оны наймдугаар сар гэхэд эхний ээлжийг нь ашиглалтад өгөх төлөвлөгөөг гаргасан.