Монголд улс төрийн байгууллага үүсэн байгуулагдсаны 94 жилийн ой, Эх орончдын өдөр өчигдөр тохиосон. Тэгвэл эл өдрийг тохиолдуулан МАХН-ын удирдлагууд, гишүүд дэмжигчдийн хамтаар Сүхбаатарын хөшөөнд цэцэг өргөж, Чингисийн хөшөөнд хүндэтгэл үзүүлсэн байна. Тус хүндэтгэлийн арга хэмжээнд МАХН-ын дарга Н.Энхбаяр, тус намын Ерөнхий нарийн бичгийн дарга, Эрүүл мэнд, спортын сайд Г.Шийлэгдамба, УИХ-ын гишүүн, Батлан хамгаалахын сайд Ц.Цолмон, УИХ-ын гишүүн О.Баасанхүү болон МАХН-ын нарийн бичгийн дарга нарын албаныхан оролцжээ.
МАХН-ын дарга, Монгол Улсын гурав дахь Ерөнхийлөгч Н.Энхбаяр 2004 онд УИХ-ын дарга байх үед эл өдрийг Эх орончдын өдөр болгон тэмдэглэх ажлыг санаачилж, УИХ-аар батламжилж байжээ. Эх орон, тусгаар тогтнолын үнэ цэнэ, түүний мөн чанарыг олон нийтэд сурталчлах, эх оронч сэтгэлгээг сэргээх, залуу хойч үедээ таниулахад эл өдрийн ач холбогдол оршдог талаар МАХН-ын дарга Н.Энхбаяр энэ үеэр онцолж байв.
Сүхбаатарын хөшөөнд цэцэг өргөж, Чингисийн хөшөөнд хүндэтгэл үзүүлсний дараа МАХН баярын хурлаа намынхаа байранд хийжээ. Энэ үеэр МАХН-ын дээд шагнал Тусгаар тогтнолын одонгоор Сүхбаатар дүүргийн намын хорооны дарга Д.Батзориг, дэд дарга Д.Эрдэнэбат, Сонгинохайрхан дүүргийн намын хорооны дарга Ц.Лхагвасүрэн, Хан-Уул дүүргийн намын хорооны дарга Я.Дашдорж нарын 12 хүн шагнагджээ. Мөн МАХН-ын Шударга үйлс алтан медалиар зургаан хүн, Шударга ёсны төлөө хүндэт тэмдгээр 11 хүн тус тус шагнагджээ.

Дашрамд сонирхуулахад, Эх орончдын баярын эл өдөр 100 орчим дэмжигчид тус намд гишүүнээр элсэж МАХН-ын батлахыг гардан авчээ.