Нийслэлийн Сонгинохайрхан дүүргийн Ардчилсан намын хорооны гишүүд өнөөдөр Монгол ньюс мэдээллийн төвд сэтгүүлчдэд мэдээлэл хийлээ. Тэд Ардчилсан намын ерөнхий нарийн бичгийн даргын үүрэг гүйцэтгэгч Л.Эрхэмбаяр өнгөрсөн 2012 оны УИХ-ын сонгуульд Сонгинохайрхан дүүргийн Ардчилсан намын хороог удирдаж ажиллахдаа МАН-тай хэрхэн урьдчилан тохиролцож, ажилласан талаарх баримтыг олон нийтэд дэлгэсэн юм.

Тодруулбал: Сонгинохайрхан дүүргийн ИТХ, Засаг даргын тамгын газрын удирдах 34 албан тушаалаар наймаа хийжээ. Таван зүйл 20 заалт бүхий энэхүү гэрээнд “ИТХ дүүргийн засаг дарга, ЗДТГ, дэргэдэх хэлтэс, албадын удирдах бүрэлдэхүүний албан тушаалын томилгоог хоёр тал харилцан тохиролцож хавсралтаар батлана” хэмээжээ. Мөн “Энэхүү гэрээг байгуулснаас хойш Сонгинохайрхан дүүргийн МАН, АН харилцан эсрэг улс төрийн акцыг зохион байгуулахгүй”, “Хамтран ажиллах гэрээний хүрээнд тохирч томилсон албан тушаалтнууддаа хариуцлага тооцохгүй” гэх заалт ч тусгайлан оруулжээ.Л.Эрхэмбаяр тэргүүтнүүд “Маш нууц” гэх энэхүү гэрээг байгуулснаараа иргэдийн сонгох, сонгогдох эрх чөлөөнд ноцтой халдсан үйлдэл болсон гэж тэд үзэж байна.