Английн Ерөнхий сайд асан Тони Блейр өчигдөр манайд нууцаар хүрэлцэн иржээ. Тэрээр ирсэн даруйдаа Монгол Улсын Ерөнхий сайд Ч.Сайханбилэгтэй уулзаж үдийн зоог барьсан талаар эх сурвалжууд мэдээлсэн юм. Тэрээр өөрийн улс төрийн карьераа дуусгасан даруйдаа өөрийн нэрээр “Тони Блейр” хэмээх санг байгуулж олон улсын төвшинд ядуу буурай болон хөгжлийн төвшин дорой орны засгийн газарт заавар зөвлөгөө өгсөөр ирсэн юм.
            Сонирхолтой нь түүнийг энэ удаа чухам  ямар асуудлаар манай оронд айлчилж буй талаарх мэдээлэл алга байна. Ямартаа ч  бусдаас заавар зөвлөгөө авах дуртай Ерөнхий сайд маань энэ удаа улс төрийн хашир нэгнээс зарим зүйлийн талаар асууж лавлах хэрэг гарсан бололтой.
        Ноён Тони Блейрийг манай оронд ирсэн шалтгаан нь яг одоо олон нийтийн анхаарлыг төвд байгаа Ноён уулыг стратегийн орд болгон эргэлтэнд оруулах, хоёрдугаар шатны хэлэлцээр явагдаж буй Тавантолгойн асуудал, ОУВС-аас авахаар яригдаж буй Стандбай зэрэг эдийн засаг, уул уурхайтай холбоотой асуудлууд дээр зөвлөгөө өгөхөөр ирсэн байж болох юм. Ер нь Тони Блейрийг манайд зөвлөгөө өгөхөөр ирэх үед олон нийт Оюутолгой болон бусад орд газруудын талаар зөвлөлдсөн байх гэж таамагладаг. Энэ удаа ч гэсэн ийм таамаг олон нийтийн дунд нэлээдгүй байна. Учир нь УИХ-аас эдийн засгийн хямралыг даван туулах төлөвлөгөөг батлахдаа томоохон төслүүд болох Тавантолгой, Оюутолгойг эргэлтэнд оруулах нь зүйтэй гэж үзсэн. Ерөнхий сайд Ч.Сайханбилэг ч ард түмнээсээ энэ талаар асууж эргэлтэнд оруулах нь зүйтэй гэсэн хариулт авсан. Тиймээс хоёр эрхэм дээрх асуудлаар ярилцсан байх магадлал хамгийн өндөр юм. Мөн түүнийг манай засгийн газартай хамтарч ажиллах гэрээ байгуулсан тэр үеэс л барууны хэвлэлүүд Оюутолгойн асуудлаар Монголд зөвлөгөө өгөх боллоо гэж бичиж байсан юм.
        Тони Блейр нь манай улсын засгийн газар, одоогийн Ерөнхий сайдтай өмнө нь ч гэсэн хамтарч ажиллаж байсан. Тэр одоогоос хоёр жилийн өмнө тодорхой гэрээний дагуу уул уурхай болон эдийн засгийн асуудал дээр зөвлөж байлаа. Мөн өнгөрсөн жил хүрэлцэн ирж МАН-ын бүлгийн дарга С.Бямбацогт болон Засгийн газрын төлөөлүүдтэй уулзаж байсан юм. Ингэснээр тэрээр манай оронд жил бүрийн хавар буюу гуравдугаар сард хаврын чуулганы өмнө ирдэг уламжлалтай болж байх шиг байна. Хамгийн сонирхолтой нь тэрээр энэ бүгдийнхээ хариуд манай улсаас нэг ч зоос авдаггүй бөгөөд Катар улс бидний өмнөөс мөнгө төлдөг гэх мэдээлэл бий. Туршлагатай, дэлхийн хэмжээний улс төрчөөс ямар ч үнэ төлбөргүйгээр зөвлөгөө авна гэдэг нэг талаараа сайхан ч гэсэн манайхан үнэгүй бяслаг зөвхөн хавханд л байдаг гэдгийг санах хэрэгтэй биз ээ.