Ерөнхий сайдын дэргэдэх Эдийн засгийн зөвлөл хоёр дахь удаагаа хуралдлаа. Тус зөвлөлийн анхны хурлаар бизнесийн орчныг сайжруулах, гадаад худалдаа, хөрөнгө оруулалтыг нэмэгдүүлэх, макро эдийн засгийн тогтвортой байдал бий болгох, бүтээн байгуулалтын том төслүүдийг урагшлуулах гэсэн дөрвөн чиглэлээр санал, зөвлөмж боловсруулан ажиллахаар болсон. Энэ удаагийн хурлаар дээрх чиглэл бүрт дэд бүлэг байгуулах, УИХ-ын тогтоолоор батлагдсан Эдийн засгийн хүндрэлээс гарах арга хэмжээний хөтөлбөр, татварын бодлогоор эдийн засгийг дэмжих арга хэмжээний тухай гурван асуудлыг хэлэлцлээ.Ерөнхий сайд Ч.Сайханбилэг Улсын Их Хурлын хоёрдугаар сарын 18-ны өдрийн 41 дугаар тогтоолоор батлагдсан Эдийн засгийн хүндрэлээс гарах арга хэмжээний хөтөлбөрийг хэрэгжүүлэх хүрээнд Засгийн газар Монгол банк, Санхүүгийн зохицуулах хороотой хамтран нарийвчилсан төлөвлөгөө боловсруулж байгааг хэлээд эдийн засгийн зөвлөлийн гишүүдийн саналыг хүлээн авч, нэгтгэхээ мэдэгдэв. Ойрын хугацаанд Засгийн газрын хуралдаанаар хэлэлцүүлэн батлуулж, хэрэгжилтийг хангуулан ажиллах юм. Мөн Монгол Улсын сайд, ЗГХЭГ-ын дарга С.Баярцогт зөвлөлийн гишүүдэд Эдийн засгийн хүндрэлээс гарах арга хэмжээний хөтөлбөрийн талаар танилцууллаа.
Сангийн яамны Төсвийн бодлого, төлөвлөлтийн газрын дарга Ж.Ганбат Засгийн газраас Татварын ерөнхий хуулийн шинэчилсэн найруулгын төсөл боловсруулж, хуулийн нэр томъёог тодорхой, нэг мөр болгох, татварын өр төлөх хугацааг сунгах, хүчингүй болгох зохицуулалт оруулах, татварын байцаагчийн эрх, үүргийг нарийвчлан тусгах зэрэг өөрчлөлт оруулж байгаа гэлээ. Одоо хүчин төгөлдөр үйлчилж буй Татварын ерөнхий хуулийн хувьд хуулийн нэр томьёог татварын байцаагч, аж ахуйн нэгж өөр өөрөөр тайлбарлан хэрэглэдэг. Иймд нэр, томъёог тодорхой, нэгдсэн байдлаар ойлгох асуудалд анхаарч байгаа гэв. Мөн иргэд, ААН татвар төлөхдөө цаг хугацаа бага зарцуулах боломж бүрдүүлж, цахимжуулах аж.
Танилцуулгын дараа зөвлөлийн гишүүд голчлон татварын бодлогоор эдийн засгийг дэмжих асуудлын талаар байр сууриа илэрхийллээ. Хувь хүний орлогыг бодитой тодорхойлж, орлогын татвар ногдуулах, Эдийн засгийн ил тод байдлын тухай болон Өршөөлийн тухай хуулийг батласны дараагаар татварын шинэчлэлээ эхлүүлэх зэрэг санал хэлэв. Энэ хурал дээр хэлсэн үг болон бичгээр ирүүлсэн саналыг нэгтгэж хүлээн авахаар тогтжээ.
