Холбооны Бүгд Найрамдах Герман Улсад ажлын айлчлал хийж байгаа Монгол Улсын Ерөнхийлөгч Цахиагийн Элбэгдорж өчигдөр Берлин хотноо зохион байгуулагдаж буй Монгол Германы бизнес форумд оролцжээ.

Монголын Хөрөнгө оруулалтын газар, Германы Ази-Номхон далайн холбоотой хамтран Монгол Улсаас ХБНГУ-д суугаа Элчин сайдын яам хамтран Берлин хотын захиргааны байранд “МОНГОЛ-ГЕРМАНЫ БИЗНЕС ФОРУМ” зохион байгуулсан аж. Арга хэмжээний хүрээнд БХБ-ын дэд сайд хатагтай Г.Байгалмаа өөрийн салбарын тухай дэлгэрэнгүй танилцуулга хийж, ЗТЯ-ны СБТГ-ын дарга С.Адьяасүрэн, Аж үйлдвэрийн яамны СБТГ-ын дарга Д.Баттогтох, Нийслэлийн Засаг даргын Нийгмийн асуудал хариуцсан орлогч Ц.Энхцэнгэл нар хариуцсан салбартаа хэрэгжүүлж буй төсөл хөтөлбөрийн талаар илтгэл тавив. Мөн Хөрөнгө оруулалтын газрын Сурталчилгаа, зөвлөх үйлчилгээний хэлтсийн дарга Д.Ирмүүн Монгол Улсын хөрөнгө оруулалтын орчны талаар товч мэдээлэл хийж, форумд оролцогч монголын компаниудын танилцуулав. Хот байгуулалтын салбарын чиглэлээр германы архитекторч ноён Ш.Шмидт монголын "Майдар сити" төслийг танилцуулсан нь арга хэмжээг сонирхолтой болголоо.

Аж үйлдвэр, аялал жуулчлал, дэд бүтэц, хот байгуулалтын салбарын 170 гаруй төлөөлөгч оролцсоны дотор  90 нь германы байгууллага, компани байсан нь монголтой хамтран ажиллах сонирхолтой германы хувийн хэвшлийнхэн хэчнээн олон байгааг илэрхийлж буй. Энэ удаагийн форумд Монголын талаас  15 компани оролцож байгаа бөгөөд Герман улстай уламжлалт бизнесийн харилцаатай аж ахуйн нэгжүүд түлхүү оролцож байгаа юм байна. Уулзалтыг нээн Германы үйлдвэр, худалдааны танхимын олон Улсын эдийн засгийн харилцааны захирал Жулиа Арнольд, Монгол Улсын Ерөнхийлөгч Цахиагийн Элбэгдорж, Берлин хотын захирагч Михаел Мюллер нар үг хэлэв.

Ерөнхийлөгч хэлсэн үгэндээ  “Монгол Германы харилцаа хэд хэдэн түвшинд идэвхтэй хөгжиж байгаа. Ялангуяа улс төрийн түвшинд. 2011 онд Герман улсын Канцлер манай улсад айлчилсан бөгөөд энэ үеэрээ чухал баримт бичгүүдэд гарын үсэг зурсан. Мөн Герман улсын Холбооны Ерөнхийлөгчтэй маш ойр харилцаа тогтоож, олон удаа уулзаж ярилцаж байсан. Канцлерын хувьд Герман Монголын харилцаанд ялангуяа эдийн засгийн харилцаанд маш их анхаарал тавьж ажилладагт талархаж байна. Өнөөдөр би богино хугацаатай  айлчлалынхаа үеэр эрхэм Канцлер болон ХБНГУ-ын Холбооны Ерөнхийлөгчтэй уулзаж ярилцах сайхан боломж гарч байна. Хамгийн чухал нь, Монгол Улс албан ёсны түншээр оролцож байгаа  олон улсын аялал жуулчлалын үзэсгэлэнгийн үйл ажиллагааг нээх хүндтэй үүргийг би  хүлээсэн. Улс төрийн үүднээс нь авч үзвэл манай хоёр орны харилцаа  маш сайн түвшиндээ эрчимтэй урагшилж байгаа . Дараагийн түвшний харилцаа бол бизнесийн салбарынх юм. Монгол Германы бизнесийн харилцааны хамгийн ойлгомжтой зүйл нь хамтран ажиллах уур амьсгал боломж нь бүрэлдсэн явдал. Монгол Улс нь, Азийн бүс нутагт байгаа Герман иргэдийн тоогоороо тэргүүлдэг.  Мөн Герман улстай хамтран ажиллах бүхий л талын үйл ажиллагаанд Монгол Улс ойр дотны улс гэж харагддаг. Бидний хувьд  Герман улсыг Европын холбооны хамгийн чухал түншээ гэж харилцсаар ирсэн түүхтэй. Энэ үйл ажиллагаанд Германы бизнесийн салбарын алдартай төлөөллүүд  ирсэн байна. Мөн Германд ажиллаж байгаа хувийн хэвшлийн байгууллагууд, холбоод маш их үүрэг гүйцэтгэсэн гэдгийг онцлон тэмдэглэх нь зүйтэй.

Монгол, Германы харилцааны хүндрэлтэй асуудал гэвэл орон зайн хувьд алсагдмал байрладаг явдал. Манай хоёр улсыг дэд бүтцийн хувьд холбосон шууд "гүүр" байдаггүй. Агаарын тээвэр байгаа ч үүнийг цаашид сайжруулах ёстой гэж бодож байна. Энд дуулгах сайн мэдээ гэвэл өнгөрсөн 2014 онд ОХУ-ын Ерөнхийлөгч В.Путин, БНХАУ-ын дарга Си Жиньпин нар Монгол Улсад  айлчилсан. Энэ үеэр олон жил ярьсан хоёр орны дээгүүр дамжин өнгөрөх тээврийг, ялангуяа БНХАУ-тай эцэслэн шийдвэрлэсэн. Сая Засгийн газрын түвшинд гэрээг нарийвчилж хэрэгжүүлэх төлөвлөгөөнүүд гарсан. Энэ бол Германы тал, Европын талд сайн мэдээ гэж ойлгож байгаа. Монголын талаас гарч ирэх ямар нэгэн барааг Хятадын нутаг дэвсгэр дээгүүр дамжуулан тээвэрлэхдээ маш их хөнгөлөлт үзүүлнэ. Коридорт ямар бараа очих, хэрхэн зөөвөрлөх зэрэг нарийн деталуудыг ярьж, шийдвэрлэж байна. Монгол Улсын баримталдаг байр суурь бол түүхий эдийг нийлүүлэх хэрэгтэй боловч  ямар нэгэн хэмжээнд Монголдоо боловсруулах түлхүү сонирхолтой. Ер нь, аливаа шатанд боловсруулсан бүтээгдэхүүнийг шууд худалдан авч хэрэглэх боломжтой. Дээрээс нь тээвэрлэхэд хүртэл бүтээгдэхүүний хувьд илүү үр ашигтай байдаг учраас Монголд тодорхой хэмжээгээр боловсруулаад гаргах боломжтой юм.

Бусад харилцаа удаан явж байгаа ч урагштай зүйлс бий гэж боддог. Монгол Улсыг аялал жуулчлалын олон улсын үзэсгэлэнгийн албан ёсны түнш орноор өнөө жил оролцохыг Германы Засгийн газар, Берлин хотын захиргаа дэмжиж  оролцуулж байгаад бид талархалтай байна. Монголын хувьд  жуулчдыг ирүүлэх, тэдэнд зориулсан дэд бүтцүүд хэрхэн бий болгох, яаж сайжруулах зэрэгт бидэнд суралцах зүйл олон бий.

Бид бол нээлттэй, ижил төстэй үнэт зүйлтэй хоёр улс. Тэр утгаар бид илүү ойлголцох боломжтой. Нэгэнт нээлттэй учраас бидний үйл ажиллагаанд гарч байгаа алдаа, хүндрэлүүдийг шийдвэрлээд явах эрмэлзэлтэй байдаг. Энэ бол манай хоёр улсын харилцааны давуу тал юм.

Мөн энэ үеэр Берлиний төвд Монголын Элчин сайдын яамны шинэ байрны нээлт болж байгаа нь Герман улстай харилцах харилцаанд маш том ахиц дэвшил гарна гэдэгт итгэлтэй байна. Ингээд чуулганы үйл ажиллагаанд амжилт хүсье” гэв.

Тус арга хэмжээнд Монгол Улсын Ерөнхийлөгч Ц.Элбэгдоржоос гадна Берлин хотын захирагч ноён М.Мюллэр, Дойче банкны ТУЗ-ийн дарга ноён Ю.Фичен нар нээж Гадаад хэргийн сайд Л.Пүрэвсүрэн, Зам, тээврийн сайд Н.Төмөрхүү, Улаанбаатар хотын захирагч Э.Бат-Үүл, Монгол Улсаас ХБНГУ-д суугаа Элчин сайд Ц.Болор, ХБНГУ-аас   Монгол Улсад суугаа Элчин сайд Г.Тийдэманн нар оролцов.