МАН-ын гишүүд Засагт хамтрахаасаа өмнө өрийн хэмжээг нэмэгдүүлэхгүй хэмээн хашгирч байв. Тэд АН-тай хийсэн гэрээндээ ч өр нэмэхгүй байх асуудлыг тусгасан. Тийм ч учраас АН-ыг өр нэмж авах талаар ярих бүрт хориг тавьж байлаа. Тэр бүү хэл УИХ дахь МАН-ын бүлгийн дарга С.Бямбацогт ДНБ-тэй тэнцэж буй өрийн хэмжээг буулгаж ажиллана хэмээн ярьж байсан билээ.

Ч.Сайханбилэгийг өр нэмж ДНБ-ийн 70 хувьтай тэнцүүлнэ гэхэд “Засгаас гарна, барина” гэж айлгаж байгаад 58.3 хувиар нь баталсан. Гэтэл тус намынхан ярьж байснаасаа тэр өөр үйлдлийг хийж олон нийтийн дургүйцлийг хүргэв. Тодруулбал, битүүний өдөр хэлэлцсэн Өрийн удирдлагын тухай хуулийг тус намынхан дэмжиж батлалцлаа. 

Уг нь Өрийн удирдлагын тухай хуулийг УИХ-ын чуулганаар хэлэлцэх эсэхийг намын бүлгүүдээр хэлэлцэх үеэр МАН-ын бүлэг тус хуулийг маш сайн судалж байж батлах ёстой гэсэн байр суурийг илэрхийлсэн. Цаашилбал тус бүлгийн дэд дарга Д.Хаянхярваа “Монгол улсын өрийн хэмжээг тус хуультай холбож үзэж байгаа. Тиймээс уг хуулийг хэлэлцэхдээ хөнгөн хуудамгай хандаж болохгүй. Тэгэхээр уг хуулийг богино хугацаанд яарч батлах хэрэггүй гэдэг зарчмын саналд нэгдсэн” гэж ярьж байсан билээ.

Гэтэл удалгүй уг хуулийг баталж орхисон. Тэд ард иргэдийг бөхөөс өөр зүйлд анхаарлаа хандуулаагүй байхад нь буюу битүүний өдөр өр нэмэх шийдвэрийг батлалцлаа.  Одоо хуулиа баталчихсан учраас нэмж 1.5 тэрбум долларын зээл авах гэж байгаа талаар эх сурвалж мэдээлж байна.

Тус хуулийн дагуу Засгийн газар 3-4 триллион төгрөгийн зээл нэмж авах боломж бүрдэнэ гэж улс төрчид ярьж буй. Харин хэзээ, хаанаас авах болон хэрхэн, яаж барагдуулах нь тодорхойгүй байгаа.

Уг нь МАН “Бид өр нэмэхгүйгээр эх орноо сайхан болгочихно” гэсэн утгатай зүйлийг яриад явж байсан санагдах юм. Тэгснээ хэрхэн, яаж төлөгдөх нь мэдэгдэхгүй Өрийн удирдлагын тухай хуулийг дэмжчихсэн нь тус намыг ард түмний өмнө худал ярьдаг гэдгийг улам илүү баталж орхилоо.