Монголын улс төрд хаврын синдром эхэллээ. Сонгууль болоход ганцхан жил дутуу байхад хаврын хүчтэй хавсаргыг өнөөх л алдарт АТГ улс төрд дэгдээв. Өнгөрсөн хавар шуурч эхэлсэн Н.Алтанхуягын ЗГ-ыг унагах давхар дээлний шуурга, намрын адаг сард сандалтай нь хийсгэж байж өндөрлөсөн бол энэ жилийн хаврын хавсаргын гол бай нь ахиад л Н. Алтанхуяг байх нь тодорхой боллоо. Үнэндээ бол "Задгай Цагаан" амтай экс ерөнхий сайд маань хаврын шуургыг өөрөө исгэрээд л дуудчих шиг болов. Тэрээр "морь" жилийн төгсгөлтэй уралдан сонинд өгсөн ярилцлагадаа АТГ-ыг ширүүхэн шүүмжилж, "нам дамнасан бүлэглэл"-тэй хатуу тэмцэнэ гэсэн мессежийг ил тод өгсөн нь дайснуудыг нь идэвхжүүлж орхисон уу гэлтэй, цагаан сарынх нь бууз шингэж амжаагүй байхад хүргэн Дэнзэнгийнх нь хэрэгт холбогдуулан ЭТТ-н захирал Н. Батсуурийг баривчилж хорив. Үүнтэй зэрэгцэн маргааш өглөө нь гэхэд л ерөнхий сайд асан Н.Алтанхуягт АТГ-аас орон сууцны 8 хувийн зээл, аймгуудыг холбосон автозам, цахилгаан дулааны станцуудын өргөтгөл, ТҮЦ машин, тэр байтугай "Манга Авардс"-раа шуугиулаад байгаа Бумбардай төсөлтэй хүртэл холбогдуулан сэжигтнээр татан шалгаж байгаа тухай мэдээ түглээ. "Хүргэн" Дэнзэн ч хил даван зугтсан тухай шуугиж эхлэв. Тэгэхээр энэ хаврын синдром зайлшгүй "оймс"-ны улс төрөөр амьсгалах магадлалтай байна. Харин нэг эргэлзээ байгаа нь нам дамнасан бүлэглэлийн хэт дураараа авирлан хууль хүчнийхнийг өөрсдийн зорилгодоо ашиглаад байгааг олон хүн, тэр дундаа хүлээн зөвшөөрөгдсөн томоохон нийтлэлчид, улс төрчид хүртэл зоригтойгоор шүүмжлэх болсноор иргэдийн дунд тодорхой "том" эрх мэдэлтнүүдийн нэр хүнд шалдаа хүртэл унаад байгаа билээ.  

    Нам дамнасан бүлэглэл өөрсдийг нь аялдан дагасан бүхний толгойг илж, тэднээс өөр байр суурь илэрхийлж үнэнийг нь хэлсэн хүмүүсийн амыг хууль хяналтын байгууллага ашиглан “барьсаар” гаршлаа гэдгийг олон хүн ойлгож хүлээн зөвшөөрч эхлээд байна. Тэдний хамгийн том айлган сүрдүүлэх зэвсэг бол АТГ болон шүүх, прокурорын газар болсон нь нууц биш. Уг нь дээрх хүчний байгууллагууд иргэдийн төлөө  ажиллах ёстой байтал, лидерүүдийн гарын аясаар, улс төрийн зорилготой хөдөлсөөр байгааг хүмүүс шүүмжилсээр байна. Хамгийн сүүлд нийтлэлч Б.Баабар хэлэхдээ “АТГ гээд хуучны Намын хянан шалгахаас доор газар гараад ирсэн, адгийн амьтдын матаас бичиж хорслоо тайлж, хөрөнгийг нь булаахад тусалдаг байгууллага уу? Үндсэн хуулийн бус энэ байгууллага өөрөө мөрдөх, тагнах, прокурордох, яллах, хүчирхийлэх, бие даан хардах, гүтгэх мэдэлтэйгээрээ Үндсэн хуулийн бүхий л инстүүцүүдийн дээр гарч тэднийг айлгаж байх “эрхтэй”. 1935 онд байгуулагдангуутаа л нам төрийн дээр гарч улс орон удирдаад явсан Дотоод явдлын яамтай нэн төстэй” хэмээн дүгнээд өнөөдөр АТГ-ээс хайрын захидал авчихсан сууж байгаа.

    Лу.Болд. УИХ-ын гишүүн, Монголын толгой баячуудын нэг. Түүнийг ч гэсэн АТГ зүгээр суулгахгүй ёстой л үйлийг нь үзэж байгаа тухай өөрөө ярьдаг. Эрхэм гишүүн тус байгууллагын эсрэг мэдээ мэдээллийг удаа дараа олон нийтэд мэдээлж байсан. Хамгийн сүүлд тэрбээр тус байгууллагыг нийгмийг айдсаар барьж байсан социализмын үеийн НАХЯ-тай зүйрлэсэн. Тэрээр “Бид ардчиллын 25 жилийн ойг тэмдэглэж байна. Энэ цаг үед чухамдаа Монголын ардчилал өөрөө хэлмэгдүүлэлтийн хар сүүдэр дагуулж гарч ирнэ гэдэг бол эмгэнэл.Энэ нь бас том сургамж байх л даа. Тэгэхээр бид үүнийг үеийн үедээ санаж, алдаагаа засч явах ёстой. Түүхэнд байсан До яам, НАХЯ гэсэн тэр муухай нэрний үргэлжпэл нь АТГ болж, ард түмний дунд “Амьдаар нь тамлах газар” ч гэл үү янз бүрийн муухай нэрээр нэрлэгдээд байгаа. Ийм байдал руу хүрэхийг Монголын ардчилсан төр хүсэхгүй байна аа.Та нар энэ нэрээ цэвэрлээч ээ. АТГ бол хамгийн хэрэгтэй байгууллага гэж боддог. Гэхдээ үйл ажиллагаанд нь засах юм байгаа учраас өнөөдөр нийгмээрээ, нийтээрээ, асуудлуудыг нь яриад байна. Энэ бол үнэхээр шинэ үеийн хэлмэгдүүлэлт. Та нар үнэхээр өөрсдөө хэргийг нотло.Та нар ийм арга барил руу шилжих юм бол наадах чинь явахгүй ээ. Хэзээ нэгэн цагт шударга ёс тогтоно. Үнэн мөн тогтоно. Та нар хариуцлага хүлээнэ. Яагаад гэвэл та нар зэвсэг нь учраас тэр” хэмээн хэлсэн юм.

    Энэ мэтчилэн олон иргэдийн бухимдал нийгмийн сүлжээгээр өдрөөс өдөрт хүрээгээ тэлсээр "том" эрх мэдэлтнүүдийн үнэн нүүр царайг улам бүр тодруулсаар байна.

    Эцэст нь "тэд" илэрхий том гарз хохирол амсаж, намаа гишүүдээ хүртэл гаргуунд гарган байж байгуулсан “Шийдлийн” засгийн газрын үндсэн зорилго юу байв? Одоогийн байдлаар тэр зорилго нь Оюутолгойн 34 хувийг зарах, Эрдэнэс таван толгойн ашиглалтыг хувийн хэвшилд шилжүүлэх зэрэг санаархал байв уу гэж таамаглагдаж байна. Иймэрхүү үйл ажиллагаагаа "Шинэчлэл"ийн ЗГ -аас үүдэлтэй эдийн засгийн хүндрэлээс гарахын тулд гэж нэрлээд Н.Алтанхуягаар "туг тахих" төлөвлөгөө нь эхнээсээ биелэлээ олж байх шиг. Энэ мэтчилэн тэд өөрсдийн замд саад тотгор учруулсан бүхнийг хуулийн хяналтын байгууллагаар дамжуулан замаасаа зайлуулах гэж байна уу даа гэх хардлага сүүлийн үед улам эрчимтэй төрөх болсноос үүдэн энэ хаврын "оймс"-ны улс төрийн эргэлзээгээ өндөрлье.