Дуучин С.Жавхлан Ерөнхийлөгч, Ерөнхий сайд, УИХ-ын дарга, гишүүдийг халз мэтгэлзээнд дуудсан. Тэгвэл тус мэтгэлзээн маргааш 21.00 цагт Үндэсний олон нийтийн телевизээр гарах юм байна.

Гэхдээ С.Жавхлангийн дуэльд дуудсан хүмүүс ирэх болов уу гэсэн асуулт олны анхаарлыг ихээхэн татаж байна. Одоогийн байдлаар УИХ-ын гишүүн Г.Уянга очих нь тодорхой болоод байгаа аж.

УИХ-ын гишүүн Г.Уянга энэ талаар "Бид ийм ярилцлагыг зөндөө хүсч байсан. Ирдэг хүн гэж нэг ч байгаагүй. Харин сүүлийн үед зурагтаар 25 жилийн өмнөх тэмцлийн үеийн дүрс бичлэг гарч байна билээ. Өнөөдрийн эрх баригчдыг гудамжны тэмцэгч байхад тэр үеийн эрх баригчид, Ерөнхий сайд нь хүрч ирээд л олон нийтийнхээ өмнө зурагтаар ярилцаж байсан байна билээ. Одоо ийм хүнийг өдрөөр дэн бариад хайсан ч олохгүй биз дээ. Миний бие төр, засгийн удирдлагыг ийм ярилцлагад олонтаа урин дуудаж байсны хувьд, олон нийтийн хөдөлгөөний тэргүүн эгнээнд байсны хувьд, өнөөдрийн нийгмийн системд ихээхэн шүүмжлэлтэй хандаж, олон нийтийн оролцоотой, тайван замын Үндсэн хуулийн хувьсгалд уриалж байгаагийнхаа хувьд, МҮОНРТ энэхүү ярилцлагыг хүндэтгэн үзэж цаг гаргаж өгсөн тул энэ ярилцлагад очих болно" гэж хэлжээ.