Ардчилсан намын гишүүд дэмжигчдийн холбооноос дөнгөж сая сэтгүүлчдэд мэдээлэл хийлээ. Тус холбоог төлөөлж тэргүүн Т.Хасбаатар болон Ардчилсан намын ҮЗХ-ны гишүүн Д.Мөнх-Эрдэнэ нар уг хэвлэлийн хуралд оролцсон юм. Хэвлэлийн хурал хийж буй зорилго нь "Тусгаар тогтнолын ордон"-ыг барихдаа улсын төсвөөс  авсан 11 тэрбумыг Ардын намаар буцааж төлүүлэхийг шаардаж буй юм байна. Мөн дээр дурдагдсан мөнгийг улсын төсөвт эргүүлэн төлөхгүй бол МАН-ын улс төрийн үйл ажиллагааг зогсооно гэж мэдэгдлээ. Энэ шаардлагынхаа хүрээнд тэд УИХ-ын дарга, Ардчилсан намын дарга З.Энхболд болон Ерөнхий сайд Ч.Сайханбилэг нарт албан ёсоор дараах шаардлагыг хүргүүлж байгаа юм байна.
           Уг шаардлагат “ 1. Монгол Ардын намын төв байр Тусгаар тогтнолын ордныг барихад зарцуулагдсан хууль бус 11 тэрбум төгрөгийг эргэн төлүүлэх асуудлыг  2015 оны дөрөвдүгээр сарын 05-ны өдөр гэхэд УИХ, Засгийн газар авч хэлэлцэхийг УИХ-ын дарга З.Энхболд, Монгол Улсын Ерөнхий сайд Ч.Сайханбилэг нараас шаардаж байна.
2. Татвар төлөгчдийн мөнгөөр санхүүжүүлсэн МАН-ын “Тусгаар тогтнолын ордон”-г барихад улсын төсвөөс авсан 11 тэрбум төгрөгийг төсөвт буцаан төвлөрүүлэхгүй бол тус намын улс төрийн үйл ажиллагааг зогсоож, 2016 оны Улсын Их Хурал, орон нутгийн сонгуульд оролцуулахгүйг мэдэгдье” гэжээ.

Уг асуудлаар Ардчилсан намын гишүүд дэмжигчдийн холбооны тэргүүн Т.Хасбаатараас зарим зүйлийг тодруулсан юм.

-“Тусгаар тогтнолын ордон”-г барихад улсаас тодорхой хэмжээний мөнгө гаргасан. Энэ үйлдлийг та хууль бус гэж үзэж байгаа аж. Энэ асуудал нэлээдгүй яригддаг ч тодорхой шийдэлд хүрэхгүй байсаар өнөөдрийг хүрлээ. Хууль бус гэж дүгнэхэд баримт нотолгоо нь хангалттай байдаг юм болов уу?

-Тухайн үед С.Баярын тэргүүлсэн Засгийн газар ажиллаж байсан. Ингэхдээ улсын төсвөөс 11 тэрбум төгрөг гаргаж энэ намын байрыг барьсан байдаг. Одоо эдийн засгийн хямралтай байгаа энэ үед хууль бусаар татвар төлөгчдийн мөнгийг авч байшин бариулсан энэ мөнгийг эргэн төлүүлэхийг л шаардаж байна.

-Тухайн үед ямар байдлаар энэ мөнгийг гаргаж өгсөн байдаг вэ. Энэ шийдвэрийг УИХ гаргасан байдаг уу, Засгийн газар гаргасан байдаг уу?

-Энэ байшинг барих үед засгийн эрхийг энэ МАН-ын эрх мэдэлтнүүд барьж байсан. Тийм болохоор өөрсдийгөө хохирогч хэмээгээд ард түмний мөнгөөр тансаг байр барьчих суугаа.

-Хуулиндаа энэ асуудлын тухай юу гэж зааж өгсөн байдаг юм бол?

-Улс төрийн намын хуулинд улс төрийн намын байрын байрыг татвар төлөгчдийн буюу улсын төсвөөр барина гэдэг зүйл заалт байхгүй. Тиймээс энэ хууль бусаар баригдсан барилгыг ядаж номын сан болгож ашиглах хэрэгтэй. Бид үүнийг хийхийн тулд шат дараалсан арга хэмжээнүүдийг авах болно.

-Шат дараалсан арга хэмжээ гэдгээ тодруулахгүй юу. Бас МАН-ын улс төрийн үйл ажиллагааг зогсооно гэсэн байна?

-Энэ байрыг улсад буцааж өгөх хэрэгтэй. Чадахгүй бол төр дуудлага худалдаагаар зарж 11 тэрбум төгрөгөө гаргаж авах нь зөв. Эвсэл ядаж номын сан болго. Хэрвээ энэ шаардлагыг хүлээж авахгүй бол бид дараа дараагийн шат дараалсан арга хэмжээнүүдийг авах болно. Мөн Ардын намын 2016 оны УИХ болон орон нутгийн сонгуульд оролцуулахгүй.