Ардчилсан намын гишүүд дэмжигчдийн холбооноос өчигдөр татвар төлөгчдийн хөрөнгөөр хууль бусаар барьсан “Тусгаар тогтнолын ордон”-г барьсан. Ардын нам энэхүү байраа эдийн засгийн хямралтай байгаа энэ үед эргүүлэн өгөх нь зүйтэй. Хэрэв өгөхгүй бол төр хурааж авч дуудлага худалдаагаар худалдах болон номын сан болгож ашиглах нь зүйтэй. Хэрэв улсаас хууль бусаар авсан 11 тэрбум төгрөгөө эргүүлэн төлөхгүй бол МАН-ын улс төрийн бүхий л үйл ажиллагааг зогсооно. Төлүүлэх үүргийг УИХ-ын дарга З.Энхболд, Ерөнхий сайд Ч.Сайханбилэг нараас шаардаж байгаагаа мэдэгдсэн юм.
               Тэгвэл өнөөдөр МАН-ын Ерөнхий нарийн бичгийн дарга энэхүү шаардлагад  хариу тайлбар хийлээ. Тэрээр “2008 оны 7 сарын 1-ний асуудалтай холбоотойгоор 2009 оны долдугаар сарын 9-нд Өршөөлийн хуулийг УИХ баталсан. Энэ үед МАН дангаараа парламентыг бүрдүүлж байгаагүй. АН-ын гишүүд парламентад сууж байсан. Энэ хуулийг дэмжиж баталсан байдаг. Хуулийн дагуу 2009 есдүгээр сарын 23-нд Хохирогчид нөхөн олговор олгох тухай журам батлах тухай Монгол Улсын Засгийн газрын 294 дүгээр тогтоол гарсан байдаг.
              2010 оны хоёрдугаар сарын 8-нд нийслэлийн Сүхбаатар дүүргийн шүүхийн шүүх хуралдаанаас 216 тоот шийдвэр гаргаж, хохирлын хэмжээг 11 тэрбум төгрөг байна гэж тогтоосон. Шүүх энэ хохирлын хэмжээг тогтоохынхоо өмнө хөндлөнгийн гурван байгууллагаар аудит хийлгэсэн. Шүүхийн шийдвэрээр “Өмч хөрөнгө нь шатсан сүйдсэн үндэслэлээр энэ мөнгө шилжсэн. Улстөрийн намын тухай хуулийн 16.1-д Намын эд хөрөнгөд үл хөдлөх, хөдлөх эд хөрөнгө байна, 16.2.6. өөрийн өмчлөлийн эд хөрөнгийг худалдах буюу түрээслүүлж ашиглуулснаас олсон орлогын талаар заасан байдаг. Үүний дагуу манай нам байраа түрээслүүлдэг. Манай намын зүгээс Лениний музейг улсын өмчид буцаасан. Ер нь бол АН-д ч бас улсын өмчөөс захирамжаар гаргуулсан дөрвөн байр бий. АН-ын Гишүүд дэмжигчдийн холбоо ийм асуудал тавьж байгаа нь харамсалтай байна. Тэгвэл АН-ын дөрвөн байрыг мөн адил улсад авах асуудлыг бид тавья” гэсэн хариулт өгсөн юм.