Өнгөрсөн 2012 оны сонгууль шинэ систем, шинэ аргачлалаар явагдсан. Тодруулбал намуудад нэрсийн жагсаалт гэж гарч ирсэн бөгөөд сонгогчдын саналыг гараар биш автомат машинаар тоолсон. Мөн эдийн засгийн хэмнэлтийг тооцоолж УИХ болон НИТХ-ын төлөөлөгчдийг сонгох үйл явцыг нэг дор өрнүүлсэн юм. Энэ нь магадгүй зарим талаараа сөрөг байдлыг бий болгосон. Ялангуяа НИТХ-ын сонгуулийн явц. Иргэд их хурлын сонгуульд илүүтэй анхаарал хандуулсан нь тухайн үедээ болон одоо ч гэсэн батлагдаж байна.
             Бид өнгөрсөн судалгаа хийх зорилгоор өнгөрсөн сонгуулиар Баянзүрх дүүрэгт МАН-аас НИТХ-д нэр дэвшиж сонгогдсон Г.Ганбаяр болон Б.Төмөрчулуун нарын талаар тухайн дүүргийн иргэдээс тодруулсан юм.


Баянзүрх дүүргийн 9-р хорооны иргэн н.Бадамжунай: НИТХ-д хэн гэдэг хүн биднийг төлөөлдөг юм бүү мэд

-Та өөрийн дүүргээс өнгөрсөн сонгуулиар МАН-аас НИТХ-д сонгогдсон төлөөлөгчдийн мэдэх үү?

-Үгүй, мэдэхгүй.

-Яагаад мэдэхгүй байгаа юм бэ, НИТХ гэдэг нийслэлчүүд бидний хамгийн сайн мэдэх ёстой зүйл шүү дээ?

-Тухайн үедээ намын хараад л нэрийг нь бөглөж байсан байх. Гэхдээ НИТХ-ын төлөөлөгчдийг ерөнхийд нь гадарлана л даа. Харин хэн нь хаанаас сонгогдсон гэдгийг мэдэхгүй юм байна.

Баянзүрх дүүргийн 23-р хорооны иргэн Б.Сумхүү: Ганц Г.Ганбаяр төлөөлөгчийг л танина

-Баянзүрх дүүргээс НИТХ-д сонгогдсон МАН-ын нэр дэвшигчдийг яг одоо нэрлэж чадах уу?

-За, миний мэдэж буй ганц хүн нь одоо НИТХ-ын тэргүүлэгч, урд нь сэтгүүлч хийдэг байсан Г.Ганбаяр гэж хүү бий. Хааяа нэг зургатаар харахаар тэр хүү л юм ярьж харагдах юм байна.

-Энэ дүүргээс МАН-аас нийтдээ хоёр хүн сонгогдсон байгаа. Та мөрийн хөтөлбөрийг нь санаж байна уу. Хэр хэрэгжиж байгаа юм бол?

-Тэрийг ёстой мэдэхгүй. Ямар ч юм ярьж биднийхээ толгойг эргүүлсэн юм бүү мэд. Бодвол гоё л юм ярьсан байх даа.

-Та яагаад тэр хүмүүсийг сонгосон юм бэ?

-Тухайн үед их хурлын сонгуультай давхар санал авч байсан. Би хувьдаа хүнийг нь биш намыг хараад л дугуйлсан даа. Би өөрөө АН-д санал өгсөн хүн.

Баянзүрх дүүргийн иргэн С.Саранзаяа: Сонгууль болгоноор л утаагүй болгон гэдэг шүү дээ

-Баянзүрх дүүргээс сонгогдсон НИТХ-д сонгогдсон НИТХ-ын төлөөлөгчдийн талаар та хэрхэн мэдээлэлтэй байдаг вэ?

-Мэдэхгүй.

-Уучлаарай та хэдэн настай вэ, өнгөрсөн сонгуульд оролцсон уу?

-2012 онд амьдралынхаа анхны сонгуулийг өгч байсан. Гэхдээ яг үнэндээ НИТХ-д хэн гэдэг хүний төлөө саналаа өгсөнөө санахгүй байна.

-Жилийн жилд ярьдаг нийслэлийг утаагүй болгоно гэдэг санааг нийслэлийн МАН-аас тавьсан байсан. Энэ зүйл хэр хэрэгжсэн гэж дүгнэж байна вэ?

-Угаасаа сонгууль болгоноор тийм зүйл ярьдаг шүү дээ. Энэ удаа харин аль нам нь юм бүү мэд утаагүй зуух гэдэг зүйлийг тараагаад л байна. Бодвол хэрэгтэй юм байлгүй.

Автобусны буудал дээр зогсох тус дүүргийн гурван иргэдийн мэдээллийг авахад л ийм байна. Өнгөрсөн сонгуулиар МАН-аас НИТХ-ын сонгуульд өрсөлдөх 45 нэр дэвшигч өрсөлдсөн.  МАН-ын НИТХ-ын сонгуульд дэвшүүлж буй мөрийн хөтөлбөр нь таван сэдэв дээр тулгуурлаж байсан. Нэн тэргүүнд Улаанбаатар хотын барилгажилт, дэд бүтцийн хөгжилд хувьсгал хийхээр болсон. Тэрхүү ажлаа ч эхнээс нь хийгээд өдий хүрсэн гэж ярьсан. Мөн нийтийн тээврийн салбарт дэвшил гарч, одоо байгаа тооцоо судалгаан дээрээ үндэслээд Улаанбаатар хотод барих метроны ажлыг эхлүүлэх том бодлого гаргасан. Мөн хотын агаарын бохирдлыг арилгах, байгаль орчныг хамгаалах төлөвлөгөөнүүд ажил хэрэг болон үргэлжилнэ. Түүнчлэн цэвэр усны шинэ эх үүсвэрийг бий болгон, барилга барихдаа цэвэр ус хэрэглэдэггүй байх тогтолцоонд оруулахаа амлаж байв. Эрүүл чийрэг, эрдэм боловсролтой, ажилтай, орлоготой иргэдтэй хот байлгахын үндэс суурийг мөрийн хөтөлбөрөөрөө дамжуулан хийхээ амласан. Үүнийгээ нийслэлийн МАН-ын хорооны дарга Г.Мөнхбаяр нэр дэвшигчдээ төлөөлөн танилцуулж байсан цаг саяхан.

2012 онд МАН-аас НИТХ-д дараах эрхмүүд нэр дэвшсэн

1. Г.Ганбаяр-НИТХ-ын төлөөлөгч, Нийслэлийн хөрөнгө оруулалтын газрын орлогч дарга, сэтгүүлч
2. Т.Насанхүү-“Монфрэш” ХХК-ийн ерөнхий захирал
3. М.Ганбаатар-НИТХ-ын төлөөлөгч, Гэр хорооллыг орон сууцжуулах төслийн захирал асан
4. Н.Алтансүх-Дүүргийн Засаг даргын зөвлөх
5. Х.Чинбат-Дүүргийн МАН-ын хорооны дэд дарга
6. Б.Төмөрчулуун-НИТХ-ын төлөөлөгч, Нийслэлийн хөрөнгө оруулалтын газрын дарга

              Харин эдгээрээс  НИТХ-ын төлөөлөгч, Нийслэлийн хөрөнгө оруулалтын газрын орлогч дарга, сэтгүүлч Г.Ганбаяр, НИТХ-ын төлөөлөгч, Нийслэлийн хөрөнгө оруулалтын газрын дарга Б.Төмөрчулуун нар сонгогдсон юм.
             Харамсалтай нь тухайн дүүргийн иргэд сонгогдсон төлөөлөгчдийнхөө талаар иймэрхүү мэдээлэлтэй явдаг юм байна. Энэ удаад Баянзүрх дүүрэгт МАН-аас сонгогдсон иргэдийн төлөөлөгчдийн талаар мэдээлэл бэлтгэн хүргэлээ. Бид цаашдаа цувралаар дүүрэг тус бүрээр нь ангилж, нам тус бүрээр нь сонгон авч тэдний мөрийн хөтөлбөрийн хэрэгжилт болон иргэдийн үзэл бодлыг хүргэх болно.