УИХ-ын Өргөдлийн байнгын хороо нь намрын чуулганы хугацаанд найман удаа хуралдаж, 22 асуудал хэлэлцжээ. Үүнээс ес нь тус байнгын хорооноос гаргасан тогтоол юм байна. Харин иргэд сонгогчдоос 1366 өргөдөл иржээ. Байнгын хороо байгуулагдсан цагаас хойш 3000 гаруй өргөдөл ирж, үүнээс 506 хүсэлтийг судлан шууд хариу өгсөн бол 272 хүсэлтийг шийдвэрлүүлэхээр холбогдох байгууллага, албан тушаалтанд шилжүүлсэн байна.

Өргөдлийн байнгын хорооны гишүүд уул уурхайн салбарт газрын дор болон хүнд, хортой нөхцөлд ажиллаж буй иргэдийн нөхөн төлбөр, Налайхын уурхайд ажиллаад өндөр насны тэтгэвэр тогтоолгосон 300 орчим иргэний нийгмийн асуудал, тэтгэврийн зээлийн хүү өндөр байгааг судалж, хүүг бууруулах боломжийн талаар судлах зэрэг өргөн хүрээнд өргөдөл ирүүлжээ. Эдгээр асуудлаар Байнгын хорооны тогтоол гаргаж, Засгийн газарт чиглэл өгч шийдвэрлэсэн бөгөөд уг асуудлыг тавьсан иргэд одоо Засгийн газарт шаардлага тавих ёстой гэж О.Баасанхүү дарга хэллээ.

Түүнчлэн “Эрдэнэс Тавантолгой” ХК-ийн 1072 ширхэг хувьцааг Засгийн газарт нэрлэсэн үнээр нь худалдах хүсэлт гаргасан боловч төлбөр нь төлөгдөөгүй тул буцаан эзэмших хүсэлт гаргасан 3375 иргэний асуудлыг шийдвэрлэж Байнгын хорооны тогтоол баталсан бөгөөд уг тогтоолоор хувьцаа эзэмшигчдийн эрх ашгийг хамгаалах, хувьцааны эдийн засгийн үр өгөөжийг хүртэх боломж бүрдүүлсэн зохицуулалтыг Тавантолгой ордын хөрөнгө оруулагчидтай хийх гэрээ, хэлэлцээрт тусгах чиглэлийг Засгийн газарт өгсөн байна.

Чуулган завсарласан энэ хугацааг ашиглаж тус байнгын хороо тэтгэврийн зээлийн хүүг бууруулах асуудлаар хэлэлцүүлэг зохион байгуулахаар бэлтгэж буй аж.