СХД-ийн АН-ын дотоод асуудал савнаасаа хальж талцаж хуваагдсан гишүүд нь сар шинийн өмнөхөн намын байрныхаа гадна жагсаал цуглаан хүртэл хийсэн. Өдгөө тус дүүргийн АН-ын гишүүдийн хуваагдал цэгцэрч, хагарч бутраад байсан гишүүд нь эв зүйгээ олж, цаашид хамтран намын үйл хэргээ хэвийн үргэлжлүүлэхээр болжээ.

  Өөрөөр хэлбэл АН-ын Үндсэн дүрмийн хүрээнд Намын хорооны гишүүдийн 1/3 нь Намын дарга Ө.Пүрэвбаатарт үүсээд байгаа нөхцөл байдлыг цэгцлэх асуудлаар ээлжит бус хурал хийхийг шаардсан гарын үсэг бүхий шаардлагыг хүргүүлсэний дагуу 03 сарын 17-ны өдөр СХД-ийн АН-ын Хорооны Ээлжит бус хурлыг зарлан хуралдуулсан аж. Эл хуралдаанд хуваагдаад байсан хоёр талын намын удирдлагууд болох дарга, дэд дарга, ХЭГ-ын дарга нар бүгд ирж оролцсон байна.

 Ээлжит бус хурлын дарга, тэргүүлэгчдээр СХД-ийн АН-ын дарга Ө.Пүрэвбаатар, Нийслэлийн АН-ын Тэргүүлэгч П.Галиндэв, Намын хорооны гишүүн Г.Оюунбилэг нар сонгогдож, удирдан явуулсан ба хурлаар хоёр тусдаа нам байгуулсан асуудлыг авч хэлэлцэн эцэслэн шийдвэрлэжээ. Тодруулбал, дүүргийн намынхан цаашид дахин зөрчилтэй нөхцөл байдал үүсгэхгүй ба намын эв нэгдлийг сахиж, гишүүд, дэмжигчид рүүгээ чиглэсэн олон арга хэмжээнүүдийг зохион байгуулж, сонгуулийн бэлтгэлийг ханган ажиллахаар санал нэгдсэнийг гишүүдийн олонхи дэмжжээ.

 Хурлын төгсгөлд СХД-ийн АН-ын дарга Ө.Пүрэвбаатарын санаачлагаар Намын дарга З.Энхболд, Нийслэлийн АН-ын дарга Э.Бат-Үүл нарт болон нийт гишүүд, дэмжигчиддээ хандсан уриалгыг гаргасан бөгөөд энэ асуудлыг хуралдаанд оролцсон гишүүдийн олонх нь дэмжин баталж, бүгд гарын үсэг зурсан байна.

  Сонгууль хаяанд ирсэн энэ эгзэгтэй үед хагарч бутран, өрсөлдөгч намынхаа “зууш” болох шахсан СХД-ийн АН-ын гишүүд эв нэгдлээ бататгасан нь “Монголчууд эвтэй байхдаа хүчтэй” гэгчийг харуулж айсуй сонгуулиар амжилтыг атгахын дохио биз ээ.