УИХ-ын гишүүн асан Л.Гүндалай өнөөдөр АН-аас гарч буйгаа мэдэгдлээ. Тэрбээр энэ талаараа “Би Ардчилсан намаас албан ёсоор гарах өргөдлөө өгөх гэж байна. Аливаа нэг зүйлийн төгсгөл нь нэг зүйлийн эхлэл байдаг. Би шинээр эхэлж байна. Би АН-аас өнөөдөр гарна. Өнөөдрөөс эхлээд улс төрийн шинэ үйл явдлыг эхлүүлнэ. Улс төрийн цоо шинэ нам байгуулахыг зорьж байгаа” гэв.

Тэрбээр мөн ирэх 2016 оны сонгуульд нэр дэвшинэ гэдгээ илэрхийлээд шинээр байгуулах нам байгуулах үйл явцаа Эрдэнэтээс эхлүүлнэ гэсэн юм.  Л.Гүндалай Эрдэнэт хотын оршин суугч болж байгаа бөгөөд энэ баасан гаригт нүүх юм байна. Нам байгуулах ажил нь бодлогын түвшинд явагдаж байгаа бөгөөд намынхаа нэрийг болон хэн хэнтэй хамтран нам байгуулж байгаагаа хэлэх нь арай эрт байна гэлээ.

Эрдэнэт хот руу нүүж буй шалтгаанаа тэрээр “Хөвсгөлөөсөө нэр дэвшиж болох байсан. Гэсэн ч намын дарга болж байгаа учраас хоттой арай ойрхон байхгүй бол болохгүй. Наашаа ирэх ажил байнга гарах болно. Тиймээс Хөвсгөл арай холдоод байгаа” хэмээн тайлбарлалаа. Тэрбээр хэвлэлийн бага хурлын дараа АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаярт өргөдлөө хүлээлгэн өгсөн юм.

Т.Хулан