Говьсүмбэр аймгийн ИТХ 2017 оны 11 дүгээр сарын 6-нд наймдугаар хуралдааныг хийж 2017 оны орон нутгийн төсөвтөө тодотгол хийжээ.
Төсвийнхөө тодотголыг баталсан хавсралтын “Говьсүмбэр аймгийн орон нутгийн хөгжлийн сангийн хөрөнгөөр хэрэгжүүлэх, хөрөнгө оруулалт, хөтөлбөр төсөл арга хэмжээний жагсаалтын 1,2,6-д “Нийтийн тээврийн үйлчилгээг бодлогоор дэмжиж, дунд оврын автобусаар хангана. Төсөвт өртөг 165 сая төгрөг” гээд заачихаж.
Ингээд хуралдааны төлөөлөгчид ИТХ-ын 06 дугаар тогтоолыг, хавсралтын нь хамт олонхийн саналаар баталж хэрэгжүүлэхээр болсон байна.
Тогтоолын хавсралтад “нийтийн тээврийн үйлчилгээг бодлогоор дэмжиж....” гээд заачихснаас үзэхэд аймгийн төвд автобусны үйлчилгээ нээх юм болов уу гэж бодмоор. Үнэндээ ч Говь-Сүмбэр аймгийн төв хоёр хэсэгт хуваагдчихсан, аймгийн хуучин төв, Хонхор хоёр өөр хоорондоо бас ч гэж нэлээд зайтай л даа. Үнэхээр энэ хооронд автобус явдаг болчихвол, хөгшид, сургуулийн хүүхдэд буянтай л ажил.
Гэтэл тамга тэмдэг дарж баталгаажуулсан тогтоол, хавсралтын энэ заалт гэнэт “Нийтийн тээврийн дунд автобус, суудлын автомашин худалдан авах. Төсөвт өртөг 165 сая төгрөг” гээд өөрчлөгдчихсөн байх нь тэр. Мөнгөн дүн нь өөрчлөгдөөгүй болохоор 165 сая төгрөгөөр хоёр машин худалдан авах болсон гэсэн үг.
Үнэхээр ч тус аймаг 165 сая төгрөгөөрөө хоёр машин авчээ. Нэг нь мэдээж анхны зориулалт болох дунд оврын автобус......Гэхдээ нийтийн тээвэрт явж байсан хуучин автобус. Нэгэнт л нэг автобус авах төсөвт өртгөөрөө хоёрын хоёр машин авч байгаа болохоор тал мөнгөөр шинэ машин авч чадахгүй нь ойлгомжтой болохоор хуучин машин л авсан нь тэр... Харин нөгөө нь мөн л суудлын автомашин.
Өнөөдөртөө улс даяар “Төсвийн хөрөнгөөр бараа бүтээгдхүүн худалдан авах тухай” хууль үйлчилж байгаа болохоор суудлын автомашин худалдан авах тендер зарлаж. Хамгийн сонирхолтой нь энэ тендерт аймгийн ИТХ-ын нэг төлөөлөгчийн эзэмшдэг компани шалгарч “Nissan Teana” маркийн машинаа аймагтаа худалджээ. Харамсалтай нь энэ машин нь монгол улсад 2016 оны зургадугаар сарын 28-нд орж ирсэн хуучин машин байх нь тэр. Тэндээ хэдэн жил ч явсан юм. Нэг үгээр хэлбэл аймгийн ИТХ-ын төлөөлөгч, албан тушаалаа ашиглан хуучин машинаа төрдөө, аймагтаа “шахсан” нь тэр.
Өнөөдөр ИТХ-ын төлөөлөгч эрхмийн аймагтаа шахсан машиныг аймаг ашиглаж байгаа бол өнөөх хуучин автобус нь хаа байгаа нь мэдэгдэхгүй, ямарч л байсан тус аймагт явж байгаа нь харагдахгүй байгаа юм байна.
Эндээс аймгийн хууль тогтоох дээд байгууллага ИТХ-ын олонхиор баталсан тогтоол, түүний хавсралтыг хэн ингэж дураараа өөрчилж “суудлын автомашин” гэсэн үг нэмэв гэсэн асуулт гарч ирж байна. Эгээ нэг бичээч дураараа өөрчилчөхөөгүй нь мэдээж. Тэгэхээр суудлын хуучин машинаа төрд шахах гэсэн тэр төлөөлөгч сэжигтэй болж таарч байна. Гэхдээ тэр төлөөлөгч тогтоолыг өөрчилж чаддаг юм гэхэд машинаа шахаж чадахгүй. Тэгэхээр түүний хуучин машиныг төрд худалдаж авах эрх мэдэл бүхий өөр нэг хүн оролцсон болж таарч байна.
Машинаа шахах гэсэн төлөөлөгч ч яахав, машиныхаа үнийг л авсан гэж бодоход түүнд машин шахах боломж олгож, тогтоол, хавсралтыг засварлан, машиныг нь худалдаад авсан тэр хүн дундаас нь ямар шиг унагаасан бол. Монгол Улсад өнөөдөр тендерт зуучилж өгсөн хүн 10 хувийг нь авдаг гэсэн жишиг тогтсон гэж ярьдаг. Энэ бол зүгээр л зарласан тендерт шалгаруулах ажлыг хийхэд шүү дээ.
Гэтэл энэ тохиолдолд зуучлагч нь хоёр том үүрэг гүйцэтгэж. Эхлээд төрийн байгууллагын баталчихсан тогтоолыг өөрчилж, дараа нь тендерт компанийг нь шалгаруулж, хуучин машиныг нь худалдан авч. Тэгэхээр хэдэн хувийн шагнал аваа бол........
Юутай ч орон нутагт төрийн эрх барьж байгаа, хууль тогтоох байгууллагын гаргаж олонхиор баталсан тогтоолыг хэдхэн хүн дур мэдэн засварлаж, хэсэг бүлэг хүн төсвийн мөнгийг гарын салаагаар урсган хувьдаа завших боломж бүрдүүлж.
Бас, нэг сайн машин авах мөнгөөр Говьсүмбэр аймагт ИТХ-ын тогтоолыг засварлан байж хоёр хуучин машин худалдаж авсан түүх энэ. Мөн аймгийн ИТХ-д иргэдээ төлөөлөн суугаа, төрийн төлөөлөгч, ард түмний элч хүн төрийн байгууллагад хуучин машинаа “шахаж” төсвийн мөнгөнөөс “завшсан” түүх.
Сэтгэгдэл (5)