НИТХ дахь Ардчилсан намын бүлэг өнөөдөр хуралдаа. Хурлаар энэ онд улсын хэмжээнд төсвийн хөрөнгөөр баригдсан цэцэрлэг, сургуулийн явцын талаар болон бусад холбогдох асуудлын талаар мэдээлсэн юм.

Энэ жил улсын хэмжээнд 672 цэцэрлэг үйл ажиллагаа явуулах ба урьдчилсан тооцоогоор 114,250 хүүхэд Сургуулийн өмнөх боловсролд хамрагдана хэмээн үзэж байна.

Төрийн өмчийн цэцэрлэгт өмнөх жил цэцэрлэгийн насны хүүхдийн 74 хувь нь хамрагдаж, үлдсэн нь төрийн өмчийн бус цэцэрлэгт хамрагддаг байсан бол энэ жилийн хувьд уг тоо 78 хувьд хүрч өснө гэсэн тооцоо байгаа гэдгийг Нийслэлийн боловсролын газрын дарга Ж.Гантулга мэдээлж байна. Энэ онд 19 цэцэрлэг, хоёр сургууль шинээр баригджээ.

Энэ жилийн тоон мэдээллээр 94 боловсролын барилга байгууламжийн ажил баригдахаар төлөвлөгдсөн ч үүсээд байгаа гол шалтгаан нь зарим ажлуудыг төр өөрөө хариуцаад, заримыг нь нийслэл рүү өгчихдөг аж.

“Улс газаргүй, зураг төсөл нь тодорхойгүй ажлуудаа нийслэл рүү өгөөд байгаа юм. Тодорхой ажлуудаа өөрөө аваад үлддэг. Үндсэндээ 44 нийслэлийн хэмжээнд хийгдэхээр байгаа юм. Үүнээс гэрээ байгуулагдсан цэцэрлэг 22 хувьтай, тендер нь зарлагдсан ажил 43 хувьтай байна. Баригдахаар төсөвлөгдсөн сургуулийн хувьд гэрээ байгуулагдсан ажил 43 хувьтай, тендер зарлагдсан нь 50 хувьтай явж байна. Уг нь эдгээр ажлууд өдий үед 90 орчим биелэлттэй явах ёстой” НИТХ дахь АН-ын бүлгийн дарга Ц.Баатархүү ярьлаа.

Мөн тэрбээр аливаа бүтээн байгуулалтын хоёрдугаар сарын 1 гэхэд бүх бичиг цаасны ажил дуусч, дөрөвдүгээр сарын 1 гэхэд тендерийн ажлыг зарлаж, тавдугаар сарын эхэн гэхэд ажил эхэлж байх ёстой ч одоог хүртэл тендер болон бичиг цаасныхаа ажилтай зууралдаад явж байна гэв.

Харин энэ талаар Нийслэлийн боловсролын газрын дарга “Уг төлөвлөгдсөн ажлуудын хойшлогдоод байгаа шалтгаан нь газар болон зураг төсөл шийдэгдээгүйгээс үүсч байна хэмээн тайлбарлалаа. Түүнчлэн иргэдтэй газрын үнэлгээ хийх асуудалд зөрүүтэй байдаг учраас цаг алдах гол шалтгаан нь болдог байна.

Б.Лхам