Засгийн газар өчигдрийн хуралдаанаараа төрийн албан хаагчдын цалинг нэмэгдүүлэхээр шийдвэрлэсэн билээ. Энэ тухай Хөдөлмөр нийгмийн хамгааллын яамны сайд С.Чинзориг тодрууллаа.  

-Төрийн албан хаагчдын цалинг нэмэгдүүлэх Засгийн газрын шийдвэр гарсан. Энэ талаар ярихгүй юу, аль салбарын цалинг хэдэн хувиар нэмэгдүүлэхээр шийдвэрлэсэн бэ? 

 “Засгийн газар 2018 оны эхээр Үйлдвэрчний эвлэлийн байгууллагуудтай гурван талт хэлэлцээр байгуулсан хэлэлцээрээр олон улсын валютын сантай төрийн албан хаагчийн цалин хөлсийг нэмэгдүүлэх чиглэлээр идэвхтэй хамтарч ажиллахаар үүрэг хүлээсэн. Энэ үүргийн дагуу ОУВС-тай хамтарч энэ оны дөрөвдүгээр улирлаас эхлэн төрийн албан хаагчийн цалин хөлсийг нэмэгдүүлэх чиглэлээр зөвшилцөлд хүрсэн. Үүний дагуу төрийн албан хаагчийн цалин хөлсийг нэмэгдүүлэх шийдвэрийг өчигдөр Засгийн газраас гаргасан. Засгийн газар төрийн албан хаагчийн цалин хөлсийг нэмэгдүүлэхдээ хэд хэдэн зарчим баримталсан. Юуны өмнө цалин хөлс багатай байгаа эдийн засгийн хямрал илүүтэй өртөж байгаа иргэдийн цалинг эхний ээлжинд нэмэгдүүлэхээр боллоо.

Хоёрдугаарт, төрийн албан хаагчийн цалин хөлсийг ажлын байрны нөхцөл, ажлын ачаалал, ур чадвар, хариуцлагаас нь хамаарсан цалин хөлсний системтэй болгоно гэж ярьсан. Үүний дагуу эрүүл мэндийн салбар болоод боловсролын салбарт ажлын байрны нөхцөл үнэлгээ хийсэн. Энэ үнэлгээ судалгааны дагуу төрийн албан хаагчийн цалин хөлсийг ажлын байрны нөхцөл, ажлын ачаалал, ур чадвар, хариуцлагаасаа хамаарсан ялгамжтай цалинтай болгохоор болсон.

Гуравдугаарт, Соёл урлагийн салбарт ажиллагсдын цалин хөлс төрийн үйлчилгээний цалин хөлснөөс 12.5 хувиар доогуур тогтоогдож ирсэн байна. Тиймээс соёл урлагийн цалин хөлсийг эхний ээлжинд нэмэгдүүлнэ.

Дөрөвдүгээрт, Багш, эмч нараас бага цалинтай байгаа төрийн албан хаагчдын цалинг ирэх есдүгээр сарын нэгнээс эхлээд найман хувиар нэмэгдүүлнэ. Энд төрийн үйлчилгээний болон төрийн тусгай алба, захиргааны албан хаагчид багтана. Төрийн албан хаагчийн цалинг нэмэгдүүлэхдээ улс төрийн алба хаагч, шүүх, прокурорын цалинг нэмэхгүй.

-Үүнийг нарийвчилбал?

-Цэцэрлэгийн болон бага ангийн, тусгай сургуулийн багш нарын албан тушаалын зэрэглэлийг нэгээр ахиулж, цалинг 12.3 хувиар буюу  87.9 мянган төгрөгөөр нэмнэ. Харин сувилагч нарын зэрэглэлийг нэгээс хоёроор ахиулж, цалинг нь 20-30 хувиар буюу 127000-183000 мянган төгрөгөөр, соёл урлагийн салбарынхны цалинг 14-32 хувиар буюу 29000-146000 төгрөгөөр нэмэх боломжтой болж байгаа юм.

-Цалин нэмэхтэй холбоотойгоор УИХ-ын 2017 онд баталсан зарим тогтоолыг цуцалсан гэсэн.

-УИХ-ын 2017 оны 29 дүгээр тогтоолын зарим заалтыг хүчингүй болгох санал гурван талд үндэсний хороонд яригдсан. Энэ саналыг өчигдрийн Засгийн газрын хуралдаан дээр танилцуулж Засгийн газар дэмжсэн. Хэд хэдэн асуудлаар энд хөндөгдөж байгаа. Тухайлбал УИХ-ын 29 дүгээр тогтоолоор дөрөв дэх заалт нь “Төрийн албан хаагчдын цалин хөлсийг 17-18 хувиар нэмэгдүүлэхгүй байх хүрсэн түвшинд хадгалах, царцаах” гэсэн ийм заалт бий. Мөн тав дахь заалтад “Төрийн албан хаагчийн зэрэг дэвийг шинээр олгохгүй байх нэмэгдүүлэхгүй байх, цалингийн шатлалыг нэмэгдүүлэхгүй байх” гэсэн ийм заалтууд байгаа. Энэ цалин хөлс нэмэгдүүлэхтэй холбоотойгоор авч байгаа арга хэмжээтэй дээрх заалт зөрчигдөж байгаа учраас эдгээр зүйл заалтуудыг хүчингүй болгох саналыг өчигдрийн засгийн газрын хуралдаанаар шийдсэн.

-Энэ удаагийн цалин хөлс нэмэгдүүлэлтэд хэчнээн хүн хамрагдаж байна вэ?

-Төрийн албан хаагчийн 92 хувь нь хамрагдаж байгаа. Нийтдээ 145 мянган төрийн албан хаагчийн цалинг ирэх есдүгээр сарын нэгнээс нэмнэ. Мөн ангилал зэрэглэлийг шинэчлэн тогтоосонтой холбогдоод энэ жил 28200 төрийн албан хаагчийн цалин хөлс 14-32 хувиар нэмэх боломжтой болж байгаа.

Р.Хишигжаргал