УИХ-ын гишүүн асан Д.Гантулга болон иргэн Ч.Наранзаяа нарт холбогдох шүүх хурал өнөөдөр 11 цагаас Баянзүрх, Сүхбаатар, Чингэлтэй дүүргийн Эрүүгийн анхан шатны шүүхэд болох байсан ч шүүгдэгч Д.Гантулгын өмгөөлөгч Н.Отгонбаяр хүндэтгэх шалтгааны улмаас шүүх хуралд оролцох боломжгүй гэсэн учир өнөөдрийн шүүх хурал хойшлогдлоо.

Энэ талаар хохирогч Ч.Наранзаяагийн өмгөөлөгч Б.Мэргэн “Шүүгдэгч өмгөөлөгчийн хүсэлтээр шүүх хурал хойшиллоо. Д.Гантулгын өмгөөлөгч Н.Отгонбаярт өөр хэрэг гарсан, өөр үйлчлүүлэгчийнх нь хурал давхцан юм уу сайн мэдэхгүй байна. Ямар нэг шалтгаанаар өмгөөлөгч нь ирж оролцож чадахгүй. Энэ удаагийн шүүх хуралд шүүгдэгчийн өмгөөлөгч Н.Отгонбаяраас бусад шүүх хуралд ирж оролцох ёстой хүмүүс бүгд ирсэн” гэлээ.

Баянзүрх, Сүхбаатар, Чингэлтэй дүүргийн Эрүүгийн анхан шатны шүүхийн тамгын газрын олон нийттэй харилцах мэргэжилтэн З.Баяржаргал “Шүүгдэгч Д.Гантулгын өмгөөлөгч Н.Отгонбаяр нь хүндэтгэн үзэх шалтгааны улмаас шүүх хуралд ирээгүй тул шүүхээс шүүгдэгчийг өмгөөлөгчөөр нь хангах эрхээр нь хангаж мөн шүүгдэгчийн өмгөөлөгчийн гаргасан хүсэлтийг хянан шийдвэрлэж 2018 оны есдүгээр сарын 12-ны өдрийн 13 цаг 30 минут хүртэл хойшлууллаа” хэмээн мэдэгдлээ.  

Р.Хишигжаргал