Хичээлийн шинэ жил болох гэж буйтай холбогдуулан БСШУСЯ-наас өнөөдөр цаг үеийн асуудлаар өргөтгөсөн мэдээлэл хийлээ.

Салбарын сайд Ц.Цогзолмаа “Бид энэ жил сурагч бүрийн сурлагын чанарт ахиц гаргах зорилт тавин ажиллаж байгаа. 2018-2019 оны хичээлийн жил нь хүүхдийн амьдарч сурах орчинг бүх талаар бүрдүүлсэн хүүхдийн төлөвшил хүмүүжил, иргэншүүлэх суурь үндэс-хөгжлийн төв байх Засгийн газрын мөрийн хөтөлбөрийг хэрэгжүүлэх жил болгож байгаа” хэмээн хурлын эхэнд онцоллоо.

Мөн тэрбээр, “Ерөнхий боловсролын сургууль, дотуур байр, спорт заалны хүчин чадал нэмэгдэж байгаа хэдий ч  хүн амын өсөлтийн хурдац, боловсролын хөгжлийн шаардлагаар шинээр үүсч буй хэрэгцээ, одоо ашиглаж буй барилгын насжилт өндөр, ашиглалтын хугацаа дууссан, зориулалтын бус барилгад сургалт явуулж байгаа зэрэг шалтгаанаас сургууль, цэцэрлэг хомсдолтой байгаа. Тиймээс 2018-2019 оны хичээлийн жилд 38 сургууль гурван ээлжээр хичээллэх төлөвтэй байна. Үүнд нийслэлийн 26 сургуулийн 205 бүлэг  багтаж байна” гэлээ.

Энэ хичээлийн шинэ жилд 76.4 мянган хүүхэд сургуульд анхлан орохоос нийслэлд 35.4 мянга, хөдөө орон нутагт 41 мянга хүүхэд элсэн орно. Харин 10 дугаар  ангид 39.4 мянган хүүхэд дэвшин суралцахаас есдүгээр анги төгсөгчдийн 87.7 хувь үргэлжлүүлэн суралцаж байгаа аж. 2018-2019 оны хичээлийн шинэ жилд улсын хэмжээнд нийт 30 мянган багш ажиллахаас 27.3 мянга нь төрийн өмчийн сургуулиудад, 2.7 мянга нь хувийн өмчийн сургуульд багшилна. Мэргэжлийн багшийн хангалт улсын хэмжээнд 95.7 хувьтай байгаа.

Энэ жилийн хувьд Багшийн хөгжлийг дэмжих тухай хууль болон ерөнхий боловсролын салбарт шинээр хэд хэдэн дүрэм, журам мөрдөж эхлэх юм байна. Тухайлбал, сурагчдын мэдлэг, чадвар, хандлагыг үнэлэх журмыг шинэчилж, тухайн хүүхдийн ахиц, өөрчлөлтийг харгалзан найман түвшнээр үнэлэх системд шилжих аж. Энэ нь хүүхдэд сурах урам зориг, боломж өгөх ач холбогдолтой талаар холбогдох хүмүүс хэлж байлаа.

Энэ хичээлийн шинэ жилийн нээлтийг есдүгээр сарын 1-ний Бямба гаригийн 13-14 цагт хийхээр төлөвлөжээ. Нийт цэцэрлэг, ерөнхий боловсролын сургуулиуд нэгэнд нээлтийн үйл ажиллагаагаа зохион байгуулах бол их, дээд сургуулиуд есдүгээр сарын 3-нд нээлтээ хийх юм байна. Монгол Улсын ерөнхийлөгчийн зарлигаар есдүгээр сарын 1-нийг Эх хэлний өдөр болгон зарласан. Мөн Хүний эрхийн үндэсний комиссоос зөвлөсний дагуу есдүгээр сарын 3-ны эхний цагийн хичээлийг Хүний эрхийн түгээмэл тунхаглал сэдвээр зохион байгуулах төлөвлөжээ.

Үүнээс гадна ерөнхий боловсролын сургуульд Эрүүл мэндийн хичээл, аюулгүй амьдрах арга ухааны чиглэлээр сургалтын агуулга шинээр орж эхлэх бөгөөд энэ чиглэлээр шинэчилсэн эрүүл мэндийн сурах бичиг гаргасан байна. Ерөнхий боловсролын сургуульд хувьд энэ жил 180 нэрийн сурах бичиг хэрэглэнэ. Үндэсний цөөнх буюу казах хүүхдэд зориулан орчуулсан 23 нэрийн, казах хэл, уран зохиолын есөн нэрийн, хөгжлийн бэрхшээлтэй хүүхдэд зориулсан 16 нэрийн сурах бичиг байх юм. Ингээд бага ангийн сурагчдыг 100 хувь, дунд ахлах ангийн сурагчдын 40 хүртэлх хувьд сургуулийн номын сангаар дамжуулан сурах бичгийг үнэ төлбөргүй ашиглуулна. Дээр дурдсан хувь хэмжээгээр сурах бичиг сургуулийн номын санд байх нөхцөлийг тогтвортой хангахын тулд жил бүр сурах бичгийн нөхөн хангалт хийдэг. Энэ жилийн тухайд бага ангийн 38 нэрийн, дунд ангийн долоон нэрийн, ахлах ангийн 20 нэрийн, казах хүүхдүүдэд зориулсан 32 нэрийн нийт 97 нэрийн 1.6 сая ширхэг сурах бичгийг нөхөн хангалтаар хэвлэн, нийлүүлэх юм. Мөн ерөнхий боловсролын сурах бичгийг цахим хэлбэрт оруулахаар зэхэж байгаа аж.

Р.Хишигжаргал