УИХ-ын гишүүн Л.Энхболд өнөөдөр Эрдэнэс тавантолгойн ордын асуудлаар мэдээлэл хийлээ. Тодруулбал, тэрбээр өмнө нь “Эрдэнэс тавантолгой”-н нутаг дэвсгэрээс 268.3 мянган тонн нүүрсийг орон нутгийн өмчит "Тавантолгой" ХХК хил давж олборлосон талаар мэдээлж байсан.

Харин Мэргэжлийн хяналтын байгууллагаас Эрдэнэс тавантолгойн тусгай зөвшөөрөлтэй газраас 268.3 мянган тонн нүүрс биш 340 мянган тонн нүүрс алдагдсан гэдгийг тогтоожээ. Мөнгөн дүнгээр тооцвол 25 сая орчим долларт хүрэх аж.

Орон нутгийн “Тавантолгой” ХХК-аас нийт 206 компани гэрээтэйгээр нүүрс дамжуулан борлуулдаг байна. Үүнээс “Тавантолгой Транс” компани 390 мянган тонн нүүрсийг эх үүсвэргүйгээр хил нэвтрүүлснийг Гаалийн ерөнхий газрын шалгалтаар тогтоогдсон байна. Аль нэг аж ахуйн компаниас худалдаж авсан гэх санхүүгийн баримт байхгүй. Ийм байдал бий болоод байгааг УИХ-ын гишүүн Л.Энхболд мэдэгдлээ.

Мөн “Таван сарын өмнө түмэндээ 268.3 мянган тонн нүүрс хулгайд алдагдлаа гэдгийг хэлж байсан нь үүгээр нотлогдож байна” гэв. Харин үүнийг хэн төлж, Монголын ард түмний баялгийг хохиролгүй болгох нь хууль хяналтын байгууллага эцэслэн тогтооно. Үүний тулд Засгийн газраас холбогдох яам буюу хяналтын байгууллага руу эдгээр асуудлыг шийдэхийг үүрэг болгожээ.

Түүнчлэн орон нутгийн Тавантолгойн компани зургаан жил уулын ажлын төлөвлөгөөгүй явж байжээ. Энэ нь тухайн цаг хугацаанд байгаль орчны төлөвлөгөө батлуулаагүй явж байсан гэсэн үг юм.

Энэ нь Ашигт малтмалын тухай болон Газрын хэвлийн тухай хууль зэргийг зөрчиж байгаа гэдгийг хэлж байна. Тиймээс тусгай зөвшөөрөлтэй газраас эх үүсвэргүй хил нэвтрүүлсэн уг хулгайн нүүрсний эзнийг тогтоож хариуцлага хүлээлгэх, ард түмний өмчийг хохиролгүй болгохын төлөө ажиллана гэдгээ УИХ-ын гишүүн Л.Энхболд илэрхийллээ.

Б.Лхам