Эрс шинэчлэл хөдөлгөөнөөс “Авилгын улмаас оффшорт дөнгөлөгдсөн Оюутолгойн нууц баримтууд” сэдвээр өнөөдөр Монгол Ньюс мэдээллийн төвд хэвлэлийн бага хурлыг  хийлээ.

Эрс шинэчлэл хөдөлгөөний Хөдөлмөр нийгэм хамгааллын дэд ажлын хэсгийн гишүүн Д.Энхбат “Монгол байгуулагдсан “Айвенхоу майнз Монголиа инк” ХХК нь Оюутолгойн хайгуулын дөрвөн лицензийг 2000 онд ВНР компаниас шилжүүлж авах, 2003 онд ашиглалтын лиценз болгож авах тухай бүрдээ хүчин төгөлдөр мөрдөгдөж байсан Монгол улсын холбогдох хуулийг тодорхой хэмжээгээр зөрчсөн байна. “Айвенхоу майнз Монголиа инк” ХХК нь холбогдох хууль тогтоомжийн дагуу шаардагдах нөхцөлүүдийг бүрдүүлээгүй байхдаа “Тогтвортой байдлын гэрээ” байгуулах саналыг Монгол улсын Засгийн газарт хандан удаа дараа гаргаж байсан. Уг компани нь хожим Оюутолгой ХХК болгож нэрээ өөрчилсөн.

“Айвенхоу майнз Монголиа инк” ХХК, Рио Тинто”-гийн хооронд хувьцаа эзэмших замаар хөрөнгө оруулах тухай тохиролцоог 2006 оноос эхлэн хийсэн. Эдгээр хоёр компанийн аль нь ч Монгол улсад ямар нэгэн лиценз, эрх, зөвшөөрөл эзэмшдэггүй, Канад, Их Британид бүртгэгдсэн, Оюутолгой ордод огт хамааралгүй этгээдүүд юм. Оюутолгойн гэрээ байгуулах тухай үндсэн үндсэн зарчим, удирдамжийг 2008 оны 40, 2009 оны 57 дугаар Тогтоолуудаар тус тус тогтоож, Засгийн газарт үүрэг болгосон. Монгол улсын Засгийн газар 2009 оны 10дугаар сард Оюутолгойн хөрөнгө оруулалтын гэрээг байгуулахдаа дээрх тогтоолуудын тодорхой заалтуудыг хангаж биелүүлээгүй гэж үзэж байна. Оюутолгойн хөрөнгө оруулалтын гэрээг байгуулахын тулд Монгол улсад холбогдох хэд хэдэн хуулийг өөрчилж, хөрөнгө оруулагч гэгддэг талд ашигтай, Монгол улсад хохиролтой байдал бий болгох нөхцөлийг бүрдүүлсэн. Энэ үед хуулиудад оруулсан өөрчлөлтүүдийн хор уршгаар Монгол улс нөөц баялгаа эзэмшиж,үнэлэх аргаар ордод тодорхой хувийг аливаа төлбөр төлөлгүй эзэмших нөхцөлөө алдсан бөгөөд гүний усыг хөрөнгө оруулагч гэх компанийн мэдэлд шилжүүлэх зэрэг олон хорлонтой үр дагавар бий болгосон” гэлээ.

Мөн тэрбээр засгийн газарт Оюутолгойн авилгын баримтуудыг УИХ, Авилгатай тэмцэх газарт хүргүүлнэ гэв.

Р.Хишигжаргал