Нэлээд хэд хоногийн өмнө АТГ-аас хэвлэлийн бага хурал зарлаж, У.Хүрэлсүхийн Засгийн газрын гурван сайд Авлигын эсрэг хуулийг зөрчсөн тухай мэдэгдсэн. Тэр гурван сайдын нэг нь Эрүүл мэндийн сайд Д.Сарангэрэл байв. Д.Сарангэрэлийн хүүгийн найз, жолооч гэсэн хамаарал бүхий хоёр хүн ЭМЯ-нд ажилд орсон байна гэж АТГ мэдэгдсэн хэрэг.
Тэгвэл УИХ-ын дарга М.Энхболдын хүүгийн найз О.Баттөмөр гэдэг залуу бас “Монголросцветмет”-ийн “Шижир алт” ХХК-ийн захирлаар ажиллаж байгаа юм байна. Зүгээр ч нэг ажиллахгүй, хөөрхөн асуудал тариад байдаг бололтой юм.
Ямар сайндаа л цахим сүлжээнд “Шижир алтын гүйцэтгэх захирал Баттөмөр байна. Одоо улсын алтыг хулгайлаад баригдаад, ТУЗ нь сольж чадахгүй байх жишээтэй” гэж бичигдэхэв. Ингэж бичсэн хүний доор бас “М.Энхболд УИХ-ын даргаасаа буугаад 60 тэрбумын хүмүүс нь хэвээрээ үлдчихвэл Л.Оюун-Эрдэнийн тэмцэл ямар ч үр дүнгүй болно. Тэр УИХ-ын даргаараа үлдвэл үлдээд 60-ын тавиулуудаа татаад авчихвал л үр дүн гарна. МИАТ-д лав нэрийг нь барьсан нөхөр нэг байна. Мэргэжлийн бидэнд зай тавьж өг л дөө” гэж Бат инженер гэдэг хүн бичжээ.
“Шижир алт” ХХК-ийн түүхийг сонирхвол, “Алт” хөтөлбөрийн хэрэгжилтийн хүрээнд Заамарын алтны шороон ордын Туулын хэсэгт үйлдвэр байгуулах тухай Засгийн Газрын 1993 оны наймдугаар сар 04-ны өдрийн 124 дүгээр тогтоолыг үндэслэн “Монголросцветмет” нэгдлийн ерөнхий захирлын 1994 оны нэгдүгээр сарын 10 ны өдрийн 04 тоот тушаалаар Заамарын алтны үйлдвэрийг байгуулжээ.
Тус үйлдвэр Төв аймгийн Заамар сумын нутагт байдаг. Заамарын алтны үйлдвэр 1994 оноос эхэлж үйлдвэрлэлийн үндсэн техник, тоног төхөөрөмжийн угсралт барилга байгууламж, нийгэм ахуйн объектуудыг ашиглалтанд оруулах ажлыг зэрэгцүүлэн гүйцэтгэж ЭШ-11/70 маркийн алхагч экскаватор, ДМ-250 маркийн драгийг ашиглалтад оруулж, манай улсад алт олборлолтоороо хамгийн томд орох 8.6 сая долларын хөрөнгө оруулалттай орчин үеийн үйлдвэрийг нормативт хугацаанаас нь хоёр дахин бага хугацаанд барьж байгуулан ашиглалтад оруулсан байдаг юм.
“Монголросцветмет” нэгдмэл дангаараа санхүүжүүлж Заамарын алтны үйлдвэрийг барьж байгуулах боломжгүй учир гурван талын оролцогч оролцсон /”Монголросцветмет” нэгдэл ОХУ-ын Зарубежцветмет нэгдэл, Эрдэнэт концернийн 51%, 25%, 24%/ “Шижир-Алт” компанийг байгуулах асуудлыг хамтарсан үйлдвэрийн зөвлөл XXII хуралдаанаараа шийдвэрлэсэн түүхтэй. Ийнхүү “Шижир-Алт” ХХК 1995 оны нэгдүгээр сарын 01 нд байгуулагджээ.
Орчин үеийн техник технологи, өндөр мэргэжлийн боловсон хүчнээр хангагдсан “Шижир-Алт” ХХК-ийн Заамарын алтны үйлдвэр нь Монгол Улсын аж үйлдвэрийн түүхэнд баттай байр сууриа эзэлж, байгуулагдсан цагаасаа өндөр үр ашигтай ажиллаж, улс эх орны эдийн засагт том хувь нэмрээ оруулсан.
2012 онд батлагдсан “Гол, мөрний урсац бүрэлдэх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль” гарсантай холбоотойгоор үйл ажиллагаагаа зогсоосон.
2017 оны тавдугаар сард Төрийн өмчийн бодлого зохицуулалтын газрын шийдвэрээр “Алт-2” хөтөлбөрийг хэрэгжүүлэх хүрээнд “Шижир-Алт” ХХК-ийг угаах төхөөрөмж Драг, алхагч экскаватор ЭШ-6/45, бульдозер Коматцу D-65E болон бусад материаллаг баазыг түшиглэн нийт 91 ажилтан, албан хаагчтайгаар үйл ажиллагааг нь дахин сэргээн ажиллаж байгаа юм.
Ер нь “Шижир алт” ХХК нь олны анхаарлаас хол байдаг ч төрийн өмчийн томоохон алтны үйлдвэр юм. Тиймээс үйл ажиллагаанд нь хяналт тавьж дээрх иргэний мэдээллийг нягтлах нь хууль хяналтын байгууллагын үүрэг болж таарна.
Нөгөөтэйгүүр, АТГ-аас гурван сайдтай холбоотой асуудлыг гаргаж тавихдаа Эрүүл мэндийн сайд Д.Сарангэрэлийг буруутгасантай яг адил зүйл эндээс гарч ирж байгаа юм. Өөрөөр хэлбэл, Д.Сарангэрэлийн хүүгийн найз болохгүй, М.Энхболдын хүүгийн найз болох уу гэж АТГ-аас асуух хэрэгтэй болж байна.
Сэтгэгдэл (28)