Монгол ардын хувьсгалт намаас өнөөдөр Үндэсний мэдээллийн төвд цаг үеийн асуудлаар хэвлэлийн бага хурал хийлээ.
Тэдний голчлон ярьж буй зүйл бол Хэнтий аймгийн 42 дугаар тойргийн нөхөн сонгуулийн талаар байв.
Тодруулбал, МАХН-ын дэд дарга Ц.Оюунбаатар “Хэнтий аймагт нөхөн сонгууль явуулах ажлыг ард иргэдийн шаардлагаар, түүний дотор 42 дугаар тойрогт амьдардаг 17 мянган иргэдийн сонгох, өөрийн төлөөллийг сонгох Үндсэн хуулийн эрхийг хангахад чиглэсэн үйл ажиллагаа явуулах болно. Үүн дээр улс төрийн бүх хүчинтэй, түүний дотор шударга ёсыг шаардаж буй улс төрийн хүчин, иргэд, олон нийттэй хамтран ажиллана. Үндсэн Хуулийн Цэц сонгууль хэзээ явуулахыг заадаг байгууллага биш ээ. Үндсэн Хуулийн Цэц бохир улс төрийн захиалгаар үндсэн хуулиа зөрчсөн үйл ажиллагаа явуулж байгааг бид эсэргүүцэн тэмцэх болно. Хэнтий аймгийн 17 мянган сонгогчдын таван мянга орчим хүн өнөөдөр сонгуулиа явуулахыг шаардсан гарын үсэг зураад байна. Энэ хүмүүс шаардлага аа Үндсэн Хуулийн Цэцэд өргөн барина. УИХ дээр энэ шаардлагуудаа бид тавих болно. Нийгэмд дэндүү шударга бус үйл ажиллагаа явагдаж, түүний дотор хууль хяналтын байгууллагуудыг татан оролцуулж байгааг таслан зогсоох шаардлагатай. Сүүлийн үед Үндсэн Хуулийн Цэцийг ч хүртэл үүндээ оролцуулж байгаа бохир улс төрийг зогсоож Монгол орныхоо хөгжлийн цогц бодлогод шилжих нь зүйтэй гэж бид үзэж байна” гэв.
Мөн улс орны өрийн асуудлыг хуучин, дипломат гэрээ хэлэлцээрийн замаар шийдэх боломж ч байгаа гэж ярьсан нь анхаарал татаж байлаа.
Мөн МАХН-ын дотоод асуудлаар, МАХН-ын Ерөнхий нарийн бичгийн дарга Э.Эрдэнэжамъяан "Биднийг, манай намыг төлөөлөх эрхгүй хүмүүс хуйвалдан намыг маань булаах гэсэн оролдлогыг бид зогсоолоо. Монгол Улсын Шүүх хуулийн хүрээнд шийдвэр гаргасан. Монгол Улсын Дээд шүүхийн шийдвэр улс төрийн намууд болон төрийн түшээдийн үйл ажиллагаа хуулийн хүрээнд байх ёстой гэдгийг хэлж өглөө. Манай намын хоёрдугаар их чуулган хоёрдугаар сарын 9,10-нд 1000 гаруй хүний бүрэлдэхүүнтэй болно. Манай намын үйл ажиллагаа хэвийн явагдаж байгаа бөгөөд мөрийн хөтөлбөрийнхөө дагуу бид хоёрдугаар чуулганаараа хэд хэдэн асуудлыг хэлэлцэнэ. Чуулганаар залуучуудад тулгарсан асуудлыг ямар аргаар шийдэх ёстой талаар чуулганы үеэр хэлэлцүүлэг зохион байгуулна” гэсэн юм.
Л.Сайнаа
Сэтгэгдэл (6)