Хоккайдо Монголын Харилцааны Нийгэмлэгээс санаачлан, Монголын Залуу Эрдэмтдийн Холбоотой хамтран 2017 оны 11 дүгээр сарын 23-24-ний өдрүүдэд Япон Монгол хоёр оронд суралцаж буй мастер, докторын оюутнууд, судлаачдын дунд харилцан туршлага, мэдлэг мэдээллээ солилцох, хамтран ажиллах боломжийг эрэлхийлэхийн сацуу эх орны хөгжилд хэрхэн өөрсдийн салбар судалгаагаар хувь нэмрээ оруулах тухай хэлэлцэх зорилгоор “Хөгжлийн гарц- Шинжлэх ухааны хэрэглээ” эрдэм шинжилгээний анхдугаар бага хурлыг Саппоро хотноо амжилттай зохион байгуулсан. Тус хурлын үеэр цаашид ажил хэрэг болгох боломжтой олон сайхан саналууд гарч, нийт хуралд оролцогчид, зочдын зүгээс хурлыг уламжлал болгон зохиох саналуудыг ирүүлсэн юм.
Энэ жил бид хурлын онцлогийг хадгалахаас гадна бусад орнуудын нэр хүнд бүхий Монголч эрдэмтдийг урьж гадны эрдэмтдийн нүдээр Монголын хөгжилд өгөх санал, зөвлөмжүүд болон шинжлэх ухааны судалгаан дээр тулгуурласан инновацийн шинэ бүтээлүүдийг багтаан хурлын цар хүрээг өргөтгөж, олон улсын хурал зохион байгуулахаар зорин ажиллаж байна.
Энэхүү эрдэм шинжилгээний онол, практикийн хурлын зорилго нь Япон, Монгол оронд суралцаж буй оюутан залуус, судалгаа шинжилгээний чиглэлээр ажиллаж байгаа судлаачдынхаа дунд харилцан мэдлэг мэдээлэл, арга зүй, туршлагаа солилцох, бие биеэсээ суралцах, цаашид хамтран ажиллах боломжийг эрэлхийлэхийн сацуу шинжлэх ухааны судалгаанд тулгуурласан шинэлэг санаа бүхий инновацийн бүтээгдэхүүнүүдийг танилцуулах зорилготой. Мөн залуу судлаачид бид эх орныхоо хөгжилд хэрхэн өөрсдийн хувь нэмрээ оруулах, Монголын шинжлэх ухааны хөгжил дэх бидний оролцоо, судалгаанаас инноваци зэрэг сонирхолтой сэдвүүдээр чөлөөт хэлэлцүүлэг өрнүүлэх юм.
Хуралд судалгаа шинжилгээний чиглэлээр ажиллаж буй нийт судлаачид, их дээд сургуулийн багш нар, мастер, докторын оюутнууд оролцох аж.
Хурал 2018 оны 11 сарын 23-25-ний өдрүүдэд Япон улсын Саппоро хотын Хоккайдогийн Их Сургуульд болно.
Л.Сайнаа