Хичээлийн шинэ жил эхлэхээс өмнө оюутнуудыг ургац хураалтын ажилд оролцуулах тухай санал санаачилга гарч байлаа. Тэгвэл энэхүү санал санаачилга нь зарим газар бодит ажил хэрэг болжээ. Тухайлбал, Дархан-Уул аймгийн хэмжээнд ХААИС-ын 96, ШУТИС-ийн 182, Хүмүүнлэгийн ухааны их сургуулийн 90, МСҮТ-ийн 300, Уул уурхайн политехникийн коллежийн 430, Дархан өргөө политехникийн коллежийн 149 оюутан ургац хураалтад оролцжээ.
Ургац хараалтын ажилд оролцох оюутны тоо цаашид ч нэмэгдэх бололтой. Учир нь, Дархан-Уул аймгийн Орхон сумын Засаг даргын Тамгын газарт 29 иргэн, гурван аж ахуй нэгж нийтдээ 392.3 га талбайд 762 оюутан авч ажиллуулах хүсэлт ирүүлсэн байна. Мөн Хонгор сумын Засаг даргын Тамгын газарт одоо ажиллаж байгаа 12 оюутны хугацааг сунгахаас гадна 10 аж ахуйн нэгж 36 оюутан авч ажиллуулах хүсэлт ирүүлжээ. Үүний дагуу Дархан-Уул аймгийн Засаг даргын орлогч А.Түвшинбат их, дээд сургуулийн захирлуудтай уулзалт хийсэн байна.
