Нийслэлийн Засаг дарга бөгөөд Улаанбаатар хотын захирагч С.Батболд энэ сарын 24-ний өдөр шүүхийн шийдвэр болон НИТХ-ын Тэргүүлэгчдийн 2010 оны тогтоолыг үндэслэн Сүхбаатар дүүргийн нэгдүгээр хорооны нутаг дэвсгэрт байх түүх, соёлын үнэт өв болсон Чойжин ламын сүм музейн хамгаалалтын бүсэд зохих зөвшөөрөлгүй эзэмшиж байгаа 3600 м2 газрыг чөлөөлж, 270м2 талбай бүхий хоёр давхар барилгыг албадан буулгах захирамж гаргасан.

Энэхүү чөлөөлсөн талбай дээр Чойжин ламын сүм музейн зүгээс тохижилтын ажил хийж, цэцэрлэгт хүрээлэн байгуулахаар төлөвлөөд байгаа юм. Уг нь аль жилийн өмнө тус барилгыг нураах байв.

Тодруулбал, төрийн хамгаалалттай бүсэд багтдаг тус музейд “Номин Холдинг” группын ерөнхийлөгч Ш.Баярсайханы хоёр давхар хаус байсан юм. Өнгөрсөн оны аравдугаар сарын 10-ны өдөр Сүхбаатар дүүргийн иргэний хэргийн анхан шатны шүүхээс түүний байшинг албадан буулгах шийдвэр гаргаж байв. Харин түүний гэрийг нураахад шүүхийн шийдвэр буюу шүүх засаглалын хүчин мөхөсдөөд байсныг дээрх үйл явдал харуулж байна.

Төрийн хамгаалалттай газар Ш.Баярсайханы байшинг дархалж даврааж байхаар цэцэрлэгт хүрээлэн болгох нь цагаа олсон шийдвэр байлаа. Нийслэл хотод амарч зугаалах, салхинд гарах газар дутна уу гэхээс илүүдэхгүй гэдгийг бид хэлүүлтгүй мэднэ.

Харин төрийн тусгай хамгаалалттай газар гэрээ барьсан дархан цаазат тухайн эрхэмд Монгол Улсын шүүх засаглалыг үл тоосных нь, иргэний үүргээ биелүүлээгүйх нь төлөө төр төмөр нүүрээ харуулах цаг болсон.

Түүгээр ч зогсохгүй өмнө дурдаж байсанчлан тухайн нутаг дэвсгэрийн Засаг даргын Тамгын газар, холбогдох байгууллагад хариуцлагыг орхигдуулж болохгүй.

Үндсэн хуулинд зааснаар хүн бүр хуулийн өмнө адил тэгш үүрэг хүлээдэг. Тэгвэл Үнсэн хуулийн хэрэгжилтийг удаашруулж, саад тотгор учруулсан Ш.Баярсайханд ёсыг сахиулж, шударга тогтолцоо бий бол түүнийг харуулж өгөхийг нэхэн хэлье.

Б.Цэрэнлхам