Дархан аварга Ж.Мөнхбатын үүсгэн байгуулсан "Их шавь" дэвжээ, спорт сургалтын төвийн шинэ байр намрын дунд сарын Дашням, Балжиннямтай билэгт сайн энэ өдөр үүд хаалгаа нээж байна.

Энэ үеэр Ж.Мөнхбат агсны хүү Мэргэжлийн сумо бөхийн 69 дэх удаагийн аварга, Хакухо М.Даваажаргалтай ярилцах завшаан тохиолдсон юм. Тэрбээр Японы Мэргэжлийн сумо бөхийн есдүгээр сарын “Аки башё”-д амжилттай барилдаж 15 даван 41 дэх түрүүгээ авч, Мэргэжлийн сумо бөхийн 1001 дахь даваа, Их аварга цолтой барилдаж эхэлснээс хойш 800 дахь даваагаа аваад байгаа билээ.

-Мэргэжлийн сумо бөхийн 41 дэх түрүүгээ авсанд тань баяр хүргэе.

-41 дэх түрүүгээ 15 даван түрүүлж, мөн 19 настайгаасаа эхэлж ялалт авсан даваа минь энэ есөн сарын башёд 1001 дахь даваа болж энэ нээлтийн ёслолд оролцож байгаадаа сэтгэл дүүрэн байна.

-Таны аавын шавь Улсын начин Ганбаатар гэж хүн байсан.  Энэ сургалтын төвийн захирлаар түүний шавь Батжаргал ажиллахаар болсон гэж сонслоо?

-Тийм. Монгол Улсын Начин Батжаргал болж байна. Ингээд Батжаргалдаа Начин гэх үнэтэй сайхан цолоо бататгаж, цаашид олон тив дэлхий болон Үндэсний их баяр наадамдаа олон цолтон төрүүлээрэй гэж хүсэн ерөөе.

-Өнөөдөр маш олон алдартнууд цугласан байна. Бүгд “Их шавь” дэвжээнээс эхлэлтэй юу?

-Тэгэлгүй яахав. Маш олон тамирчдыг “Их шавь” дэвжээ төрүүлсэн байдаг. Цааш цаашдын тэмцээнүүдэд энэ дэвжээнээс олон гавьяат тамирчин төрүүлээрэй гэж ерөөж байна. Өнөөдөр уулзаагүй байсан олон хүмүүстэйгээ тааралдаад баяртай байна.

-Та аавынхаа Хөдөлмөрийн баатар тэмдгийг зүүсэн талаар ярьсан. Яагаад өөрийнхийгөө зүүгээгүй юм бэ?

-Миний аав олон сайхан тамирчин төрүүлж байсан. Тиймээс бэлгэшээж аавынхаа тэмдгийг зүүсэн байгаа.

-Та сумо бөхийн дээд амжилтыг эвдлээ шүү дээ. Цаашид амжилтаа хэрхэн ахиулахаар зорьж байгаа вэ?

-Цаашид энэ амжилтаа бататгаж, сумо сонирхогч Монголын ард түмнийхээ итгэлийг алдахгүй л гэж бодож байна даа.

-2020 оны Токиогийн олимпийг та нээнэ шүү дээ?

Тийм ээ. Монголынхоо баг тамирчдыг дэмжих болно оо.

Л.Сайнбаяр