Монгол Улсын Дархан аварга, Хөдөлмөрийн баатар, Гавьяат тамирчин, Олимпийн наадмын анхны мөнгөн медальт Ж.Мөнхбатын 1992 онд спортын бусад зүтгэлтэн нар хамтран үүсгэн байгуулсан "Их шавь”-ийн дээд сургууль “Их шавь” дэвжээ, спорт сургалтын төв болон шинэчлэгдэж намрын дунд сарын билэгт сайн энэ өдөр өөрийн шинэхэн байрандаа үүд хаалгаа нээлээ.

Нээлтийн үйл ажиллагаанд Японы мэргэжлийн Сумо бөхийн 69 дэхь Их аварга, Хөдөлмөрийн баатар, Гавьяат тамирчин Хакухо М.Даваажаргал, Монгол Улсын Дархан аварга, Хөдөлмөрийн баатар, Гавьяат тамирчин, Олимпийн анхны мөнгөн медальт Ж.Мөнхбат агсны гэргий Ө.Тамир, том хүү М.Батхуяг, Дархан аварга Г.Өсөхбаяр, Монгол Улсын аварга Г.Эрхэмбаяр, Олимпийн алтан медальт, Хөдөлмөрийн баатар, Гавьяат тамирчин Э.Бадар-Ууган, Монгол Улсын гарьд Д.Рагчаа, Монгол Улсын харцага Г.Элбэг, Монгол Улсын Тод манлай уяач Б.Даваахүү, Монгол Улсын Ардын Багш Ч.Дамдиншарав тэргүүтэй олон зочид төлөөлөгчид хүрэлцэн ирсэн байв.

Үйл ажиллагааг нээж Их шавь спорт сургалтын төвийн захирал, Бөхийн чөлөөт барилдааны ОУХМ, Монгол Улсын начин Б.Батжаргал “Энэ цугларсан та бүхэндээ намрын дунд шинийн 17-ны билэгт сайн өдрийн мэндийг хүргэж байна. Миний аав 1992 онд спортын алдарт зүтгэлтнүүдтэй хамтран энэ сургуулийг үүсгэн байгуулсан. Үүсгэн байгуулагдсан цагаас хойш дэлхийд алдар нэрээ цуурайтуулсан олон сайхан тамирчид, спортын чадварлаг боловсон хүчнүүд бэлтгэгдсэн. Мөн үндэсний уламжлалыг өнөөг хүртэл залгаж, тээж яваа үндэсний бөхийн аварга, арслан, заан, гарьд, харцага, начингууд олноор төрөн гарлаа. Бид 2012 онд “Их шавь” дэвжээ болж бөхийн төрлүүдээр хүүхэд багачуудыг бэлтгэж эхэлсэн. Энэ жил бид “Их шавь” дэвжээ, спорт сургалтын төв болон үүд хаалгаа нээж байна. Бидний зорилго бол дэлхийн дэвжээнд эх орныхоо нэрийг өндөрт өргөх тамирчдыг бэлтгэх, эрүүл монгол хүн бэлтгэх, хүүхэд залуучуудыг чөлөөт цагаа зөв боловсон өнгөрүүлэх нөхцөл бололцоог бүрдүүлэх, олон улсын стандарт сургалтыг эх орондоо нэвтрүүлэх, Монголд багийн спортыг хөгжүүлэх тал дээр зорилго тавин ажиллах болно. Эцэг эхийнхээ үлдээсэнг залгамжлан явах нь үр хүүхэд бидний үүрэг юм. Тиймээс энэ сайхан голомтод цаашдаа эх орныхоо нэрийг дуурсгасан олон олон тамирчид бэлтгэгдэнэ гэдэгт итгэлтэй байна. Мөн Японы мэргэжлийн Сумо бөхөд өндөр амжилт гаргаад ирсэн Даваажаргал аваргадаа баяр хүргэе” гэв.

Удалгүй тайзнаа Уртын дууч, бөх цоллооч Б.Мөнхбаатар, морин хуурч Р.Амарбаярын хамтаар “Эр бор харцага” дууг дуулж, нэгэн өдрийн жавар үргээлээ.

“Эр бор харцага нь
Жигүүрэндээ хүчтэй л байна уу даа
Идэрхэн залуу насанд нь
Даанч ажигч үгүй явлаа даа
Ай хөөрхий алдрай мину зээ
Арслангийн зулзага
Ууландаа хүчтэй л билүү дээ
Амрагийн хоёр сэтгэл
Аль алиндаа асрамжтай л билүү дээ
Аяа хөөрхий алдрай мину зээ” хэмээн дуулахад хүрэлцэн ирсэн зочид чимээ намжаан сонслоо.

Түүний дараа Японы мэргэжлийн Сумо бөхийн 69 дэхь Их аварга, Хөдөлмөрийн баатар, Гавьяат тамирчин Хакухо М.Даваажаргал тайзнаа уригдан үг хэлсэн юм. Тайз руу гарахдаа аавынхаа зурганд хүндэтгэл үзүүлэн ёслов.

Тэрбээр “Өнөөдөр аавынхаа Хөдөлмөрийн баатрын одонг бэлгэшээн зүүж ирлээ.Миний аавын шавь Монгол Улсын начин Ганбаатар гэж хүн байсан. Талийгаач маань өөрийн шавь Батжаргалыг хөтлөн ирж байсан үе саяхан. Бидэнд энэ сайхан залууг, энэ сайхан хойч үеийг гал голомтыг минь залгамжлуулахаар үлдээжээ. Батжаргалдаа цаашдаа цолоо ахиулж олон сайхан шавь төрүүлэн гаргахыг хүсэн ерөөж байна. Энэ сайхан арга хэмжээнд хүрэлцэн ирсэн та бүхэндээ баярлалаа” гэв.

Их шавийн дээд сургуулийн 2009 оны төгсөгч Олимпийн алтан медальт, Монгол Улсын Хөдөлмөрийн баатар, Гавьяат тамирчин Э.Бадар-Ууган тайзнаа гарч Монгол Улсын харцага Г.Элбэг, тус сургалтын төвийн дасгалжуулагч Батнамсан нарыг Монголын Олимпийн ерөнхий хорооны “Олимпийн алдар” тэмдгээр шагнасныг гардуулан өгсөн юм.

Шагнал гардуулсны дараа “Motive” хамтлагийн дуучин Сайнаа “We are the champions” дуугаар цугларсан олонд ая дууны мэндчилгээ дэвшүүлэв.

Улмаар шинэ сургалтын төвийн нээлтийн үйл ажиллагааны тууз хайчлах ёслол болсон юм. “Их шавь” сургуулиас гарсан олон аварга байдаг бөгөөд тэдгээрийн залгамж халаа мөн л энэ дэвжээнээс гарах нь дамжиггүй биз ээ.  

Удалгүй бид дотогш орж шинэ байртай танилцсан юм. Залгуулан заалны барилга шийдэгдсэн байх бөгөөд арван давхар барилгад сургалтын болон, багш суралцагчдын ажиллаж амьдрах орчинг шийдсэн байна.

Эндээс эхлэх, эхэлсэн бүхнийг буян заяа үргэлж түших болтугай гэсэн сайхан ерөөлийг дэвшүүлье.

Л.Сайнбаяр