Өнгөрсөн долоо хоногт болж өнгөрсөн онцлох үйл явдлуудаас хүргэж байна.
О.БААСАНХҮҮ: ИПОТЕКИЙН ХҮҮГ ГУРВАН ХУВЬ БОЛГОХ БОЛОМЖТОЙ
УИХ-ын гишүүн О.Баасанхүү ипотекийн хүүг гурван хувь болгох боломжтой талаар мэдээлэл хийлээ. Тэрбээр УИХ, Засгийн газарт шаардлага хүргүүлж, Байнгын хороогоор дамжуулан УИХ-ын тогтоолын төсөл санаачилж батлуулна.
Энэ тухай ярих болсон шалтгаан нь ихэнх хүмүүс банкууд ипотекийн зээл өгдөг гэж ойлгож байна. Банк гэдэг бол миний, таны хадгалсан мөнгийг авч бусдад дамжуулдаг. Банкны хүүг багасгах боломжтой гэсэн судалгаа хийгдсэн байна. Бизнесийн зээл 20 хувьтай байгаа.
ЕРӨНХИЙ САЙД МАШИНТАЙ ЖАГСАГЧДЫН ТӨЛӨӨЛЛИЙГ ХҮЛЭЭН АВЧ УУЛЗАВ
Монгол Улсын Ерөнхий сайд У.Хүрэлсүх машинтай жагсаал зохион байгуулж байгаа иргэдийн төлөөллийг хүлээн авч уулзлаа. Бензин, шатахууны үнэ өсч, энэ нь өргөн хэрэглээний барааны үнэд нөлөөлөн, иргэдийн амьдралд ихээхэн дарамт болж байгаа учир төр, засаг дорвитой арга хэмжээ авахыг шаардан иргэд автомашинтай жагсаал зохион байгуулж байгаа юм. Тэд шатахуун түгээх газрууд шатахуунаа дутуу шахдаг, хуурамч бензин үйлдвэрлэдэг, импортлогч аж ахуйн нэгжүүд төр, засагт шахалт үзүүлж мөнгө авдаг, үгсэн хуйвалдаж үнэ нэмдэг зэргийг уулзалтын үеэр хөндлөө.
СОНГУУЛИЙН ХУУЛИЙН ЗААЛТ ҮНДСЭН ХУУЛЬ ЗӨРЧСӨН ЭСЭХИЙГ ХЭЛЭЛЦЭЖ БАЙНА
Үндсэн хуулийн цэцийн Дунд суудлын хуралдаан болж байна. Тус хуралдаанаар Сонгуулийн тухай хуулийн зарим заалт Үндсэн хууль зөрчсөн эсэхийг хэлэлцэж байгаа юм. Сонгуулийн хуульд “Орон нутгийн хурлын төлөөлөгчийн бүрэн эрх нь хүлээн зөвшөөрөгдсөний дараа нэр дэвшигчийнх хувьд нэрийн жагсаалтаас хасах тухай сонгуулийн хорооны шийдвэр гарсан бол тухайн төлөөлөгчийн мандат нь хүчингүй болж, бүрэн эрх нь дуусгавар болно” гэж заажээ.
С.АМАРСАЙХАН: ЗАСАГ ДАРГЫН МӨРИЙН ХӨТӨЛБӨРИЙН ҮНДСЭН ЧИГЛЭЛИЙН ЯВЦЫГ 80 ХУВИЙН ГҮЙЦЭТГЭЛТЭЙ ГЭЖ ДҮГНЭСЭН
Ерөнхий сайд У.Хүрэлсүх Нийслэлийн Засаг даргыг огцруулах тухай саналыг өнгөрсөн даваа гаригт НИТХ-д хүргүүлсэн. Үүнтэй холбоотой зарим зүйлийг НИТХ-ын дарга С.Амарсайханаас тодрууллаа.
-Ерөнхий сайдаас Нийслэлийн Засаг даргыг огцруулах тухай санал ирсэн байгаа шүү дээ. Шийдвэр нь хэзээ гарах вэ?
-Монгол Улсын Ерөнхий сайдаас хотын даргын асуудлыг шийдвэрлэхтэй холбоотой албан санал ирсэн. Энэ хүрээнд бид асуудлаа тэргүүлэгчдийн хурлаараа хэлэлцэнэ. Ээлжит бус хуралдаанаа зарлана. Хуулийн дагуу 15 хоногийн дагуу хэлэлцэж хурлаараа шийдвэр гаргах ёстой учраас энэ хугацаанд хэлэлцэж, зохих ёсных нь шийдвэрийг гаргаж, холбогдох байгууллагуудад нь хүргэнэ.
МАН-ЫН БҮЛЭГ ЕРӨНХИЙЛӨГЧИЙН ХОРИГИЙГ ХҮЛЭЭЖ АВАХГҮЙ
УИХ дахь МАН-ын бүлэг өнөөдөр хуралдаж, 2019 оны төсвийн тухай хуульд бүхэлд нь тавьсан Ерөнхийлөгчийн хоригийг хүлээн авах эсэхийг хэлэлцсэн.
Бүлгийн хуралдаанаар Ерөнхийлөгчийн тавьсан хоригийг хүлээн авах боломжгүй гэж үзжээ.
Харин УИХ дахь АН-ын бүлэг Ерөнхийлөгчийн хоригийг хүлээн авч дэмжинэ гэдгээ өнөөдөр илэрхийлсэн юм.
Ч.УЛААНЫГ ХААХҮ-ИЙН САЙДААР ТОМИЛОХ САНАЛЫГ ЕРӨНХИЙЛӨГЧ ДЭМЖЛЭЭ
Монгол Улсын Ерөнхийлөгч Х.Баттулга Засгийн газраас ирүүлсэн Хүнс, хөдөө аж ахуй, хөнгөн үйлдвэрийн сайдад Ч.Улааныг томилуулахаар зөвшилцөх тухай албан бичгийн хариуг өнөөдөр Засгийн газрын хэрэг эрхлэх газрын дарга Г.Занданшатарт гардуулж, сайдад нэр дэвшигч Ч.Улааныг хүлээн авч уулзав. Энэ үеэр Монгол Улсын Ерөнхийлөгч Х.Баттулга УИХ-ын гишүүн Ч.Улаантай хөдөө аж ахуйн салбарт нэн тэргүүнд хийж, хэрэгжүүлэх ажил, салбарын төсөл, төсвийн асуудлаар санал солилцож, ярилцсан юм.
Д.ТОГТОХСҮРЭНГ МАН-ЫН БҮЛГИЙН ДАРГААР ТОМИЛЛОО
МАН-ын бүлгийн өнөөдрийн хуралдаанаар Д.Тогтохсүрэнг МАН-ын бүлгийн даргаар томиллоо. Бүлгийн хуралд 54 гишүүн оролцож 90.7 хувийн саналаар УИХ-ын гишүүн Д.Тогтохсүрэнг томиллоо.
ЭЛЧИН САЙД Я.АРИУНБОЛД ИТГЭМЖЛЭХ ЖУУХ БИЧГЭЭ БАРИВ
Монгол Улсаас Канад Улсад суух Онц бөгөөд Бүрэн эрхт Элчин сайд Я.Ариунболд 2018 оны 11 дүгээр сарын 13-нд Канад Улсын Амбан захирагч эрхэмсэг хатагтай Жюли Паетад Итгэмжлэх жуух бичгээ барив.
ТӨРӨӨС МӨНГӨНИЙ БОДЛОГЫН ТАЛААР 2019 ОНД БАРИМТЛАХ ҮНДСЭН ЧИГЛЭЛ БАТЛАГДЛАА
УИХ-ын өнөөдрийн нэгдсэн чуулганаар Төрөөс мөнгөний бодлогын талаар 2019 онд баримтлах үндсэн чиглэлийн төслийг эцсийн хэлэлцүүлгээр хэлэлцэн баталлаа. Ирэх онд баримтлах мөнгөний бодлогын үндсэн чиглэл нь бүхэлдээ санхүү, эдийн засгийн тогтвортой байдлыг хангахад чиглэж, санхүүгийн хэрэглэгчдийн эрх ашгийг хамгаалах эрх зүйн зохицуулалтыг бий болгох бодлогын алхмууд хийх гэж байгаагаараа онцлог юм.
ИМПОРТ 140.4 САЯ ДОЛЛАРААР, ЭКСПОРТ 56 САЯ ДОЛЛАРААР ТУС ТУС ӨСЧЭЭ
Үндэсний статистикийн хорооноос аравдугаар сарын нийгэм, эдийн засгийн нөхцөл байдлын талаар мэдээлэл хийлээ.
Ажиллах хүчний судалгааны 2018 оны 3 дугаар улирлын дүнгээр улсын хэмжээнд ажиллах хүч буюу 15, түүнээс дээш насны эдийн засгийн идэвхтэй хүн ам 1.3 сая болж, 721.0 (54.2 хувь) мянга нь эрэгтэй, 610.3 (45.8 хувь) мянга нь эмэгтэйчүүд байна.
Б.Лхам