“FARO Faundation Mongolia” ТББ-аас санаачлан хэрэгжүүлж буй “Цахим бичиг үсэг” хөтөлбөрийн нээлт боллоо.
Нээлтэнд Хонгконг, Тайвань, Монгол дахь фэйсбүүк компанийн төлөөлөл, Монголын харилцаа холбоо зохицуулалтын газар болон ерөнхий боловсролын сургуулийн багш холбогдох төлөөллүүд оролцлоо.
Тус төрийн бус байгууллага нь цахим орчин дахь аюулгүй байдлыг хангахад дэмжлэг үзүүлэх үйл ажиллагааг хэрэгжүүлэх, тоон бичиг үсгийн тухай хичээл заах, хүүхэд хамгааллын хөтөлбөр, цахим орчинд зохистой хэрэглээг хэвшүүлэхэд чиглэж ажиллах, олон нийтэд сурталчлах зорилготой уг хөтөлбөрийг хэрэгжүүлж байгаа юм байна.
Хөтөлбөрийг хэрэгжүүлснээр цахим ертөнц болон хариуцлагын уялдааг ойлгох болон зураг, нийтлэл зэрэг цахим контентуудыг бий болгох хуваалцах зэрэгт шаардагдах чадваруудыг хөгжүүлэх төдийгүй хүүхэд залуучуудад цахим орчинд олсон мэдээлэлдээ шүүмжлэлтэй хандан аливаа мэдээллийг боловсруулж сурах аж. Тоон бичиг үсгийн номын сангийн хөтөлбөрийг фэйсбүүкийн хамтрагч байгууллагууд болох Харвард их сургууль, Беркман Клейн төвийн мэргэжилтнүүд боловсруулжээ.
Энэ талаар Хонгконг, Тайвань, Монгол дахь фэйсбүүк компанийн Жорж Чэн “Өнөөдрийн хувьд маш чухал түүхэн өдөр болж байна. Фэйсбүүк компанийн хувьд дэлхий даяар явуулдаг хөтөлбөрийг Монгол хэлнээ буулгаж, Монгол сургуулиудад үнэ төлбөргүй сургах, заах боломжийг олгож байна. Уг ажилд партнераар ажиллаж байгаа Мэдээлэл харилцааны технологийн газар FARO Foundation Mongolia төрийн бус байгууллагад талархал илэрхийлье. Нийгмийн сүлжээ хүчтэй хөгжиж буй энэ үед тоон бичиг үсэгтэн байх нь маш чухал байна. Энэ нь алваа улс орны стратегийн хэмжээнд яригдах ёстой чухал чадвар юм. Уг хөтөлбөрийн гол зорилго нь сурагчдыг аливаа мэдээллийг хүлээн авахдаа эх үүсвэрийг нь шалгаж, найдвартай эсэхийг нь лавладаг, олон талын эргэцүүлэлтэй болгох хөтөлбөр юм. Хөтөлбөрийн сургалтын төлөвлөгөөнд хувийн нууц, онлайн аккаунтын аюулгүй байдал болон нийгэмд түгээмэл байдагш сөрөг талуудыг хэрхэн шийдвэрлэх талаар сургана” гэв.
Ингээд “Цахим бичиг үсэг” хөтөлбөрийг Монголд хэрэгжүүлэхээр ажиллаж буй “FARO Faundation Mongolia” ТББ-ын үүсгэн байгуулагч А.Бямбажаргалаас зарим зүйлийг тодрууллаа.
- “Цахим бичиг үсэг” хөтөлбөрийг хэрэгжүүлснээр сурагчдад ямар давуу тал бий болно гэж үзэж байна вэ?
-“Цахим бичиг үсэг” хөтөлбөр Монголд орж ирж байгаа нь олон талын ач холбогдолтой л доо. Учир нь ирээдүй, хойч үеэ цахим орчинд зөв хандлагатай болгоход сургаж, төлөвшүүлэх хэрэгтэй. Бид бага байхдаа цахим орчин гэх зүйлийн талаар төсөөлөлгүй байлаа. Гэвч одоогийн нийгэм тухайн үеийнхээс шал өөр болсон. Хандлага нь ч тэр. Тиймээс дэлхий ертөнц даяаршиж байгаа энэ үед цахим орчинг зөв ашиглахад суралцахгүй бол нийгмээсээ хоцрох зэрэг эрсдэлүүд бий болно. Тийм ч учраас уг хөтөлбөрийг хэрэгжүүлэх нь маш чухал гэж үзэж байгаа.
-Ерөнхий боловсролын сургуулиудтай хамтарч ажиллана гэсэн шүү дээ. Одоогоор хамтарч ажиллахаар төлөвлөсөн хэчнээн сургууль байна вэ?
-Эхний сургалт энэ баасан гарагт эхэлнэ. Уг хөтөлбөрийг хэрэгжүүлэх үүднээс ерөнхий боловсролын 20 сургуультай хамтран ажиллахаар болсон. Бидний гаргасан төлөвлөгөөгөөр нэг сургуульд 500 орчим хүүхдийг хамруулна гэж үзвэл нэг семистерт 10 мянган хүүхдийг хамрах боломжтой юм. Хэрэв уг үйл ажиллагаа үр дүнтэй байж чадвал цаашид Боловсрол, соёл шинжлэх ухаан, спортын яамтай хамтран ерөнхий боловсролын бүх сургуулиудад нэвтрүүлэх боломжтой.
Энд нэг зүйлийг дурдъя. “FARO Faundation Mongolia” ТББ Харвардын сургуульд бэтгэгдсэн хөтөлбөрийг Монгол хэлнээ орчуулан хүүхдүүдэд ойлгомжтой болгосон юм.
Энэ нь багш сурган хүмүүжүүлэгч болон хүүхдүүдэд зориулагдсан байсан. Харин бидний зүгээс эцэг эхчүүдийг хамруулах хэрэгтэй гэж бодон тэдэнд зориулан зургаан хичээл явуулахаар бэлтгээд байна. Ингээд эцэг эх, багш сурган хүмүүжүүлэгч, сурагчдад хэрэгтэй сургалт болно гэж найдаж байна.
-Цахим орчинд хүүхдүүд ямар мэдээ мэдээлэл хэрхэн олж уншиж байгаа талаар хяналт байдаггүй шүү дээ. Уг хөтөлбөрийн хүрээнд эрсдэлээс хамгаалахад яаж ажиллах талаар жишээ дурдвал?
-Тухайлбал, бид хамгийн эхний хичээлээрээ хувийн нууцтай холбоотой хичээл заана. Цахим орчинд аль сургуулийн хэддүгээр ангийн сурагч, хаана амьдардаг талаар өөрийнхөө дэлгэрэнгүй мэдээллийг постолчихвол зөвхөн таны найз биш лайк дарсан хүмүүсийн найз нь давхар харна гэсэн үг шүү дээ. Тэгэхээр хувийн мэдээлэл интернэтэд нэг л орсон хэн ч төвөггүй харж, дамжуулах боломжтой. Тиймээс бид хувийн нууцлалаа хэрхэн хамгаалахыг сурагчдад ойлгуулах юм.
Б.Лхам
