Сонгинохайрхан дүүргийн Баянхошуу орчимд үйл ажиллагаа явуулдаг “Синчи газ” шатахуун түгээх газраас энэ сарын 2-нд хий алдагдсан талаар бид өмнө нь мэдээлсэн.

Тодруулбал, өчигдөр 16.53 цагт мэдээлэл шуурхай төвийн 101 тусгай дугаарт Сонгинохайрхан дүүргийн VIII хороо “Синчи газ” ХХК-ийн шингэрүүлсэн хийн түлш түгээх түгээгүүрээс хийн түлш алдагдсан дуудлага ирсэн байна. Дуудлагын дагуу тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн найман албан хаагч, хоёр автомашин очиж, шуурхай арга хэмжээ авч ажилласан юм.

Алба хаагчид хөөсний уусмал бүхий усаар саармагжуулж, аюулгүй байдлыг хангаж ажилласан бөгөөд уг шалтгаан нөхцөлийг тодруулахаар нийслэлийн Мэргэжлийн хяналт, нийслэлийн Цагдаагийн газар болон нийслэлийн Онцгой байдлын газраас ажиллаж байна.  Тухайн үед хийн түгээгүүр дэх төв хоолойг хааж, үйл ажиллагаагаа түр зогсоосон юм. Хэргийн газарт үзлэг хийх үеэр хий дамжуулах хоолойд үлдсэн шингэрүүлсэн хий алдагдсан байдалтай байжээ.

Чухам юунаас болж хий алдагдсныг шалгалтаар тодруулах юм байна. Хэрвээ байгууллагын буруутай үйлдлээс болж газ алдаж, иргэдийн амь нас, эрүүл мэндэд эрсдэл учруулсан бол тусгай зөвшөөрлийг цуцлах арга хэмжээ авна гэдгийг албаны эх сурвалжаас мэдээллээ. Мөн тухайн үед хэдий хэмжээний газ алдагдсан талаар нийслэлийн Онцгой байдлын газраас тодруулах гэтэл “Шалтгаан нөхцөлийг тодруулахаар ажиллаж байна. Шинжилгээний хариу гартал мэдээлэл өгөх боломжгүй” гэв.

Шинжилгээний хариу 3-7 хоногийн дараа бөгөөд үүний дараа “Синчи газ” ХХК-ийн үйл ажиллагаа хаах эсэх нь шийдэгдэх юм байна.

Б.Лхам