Монгол Улсын Засгийн газар болон ЖАЙКА хооронд байгуулсан “Инженер, технологийн дээд боловсрол” төслийг БСШУСЯ-наас 2014 оноос хэрэгжүүлж эхэлжээ. Уг төсөл нь өндөр мэдлэг, ур чадвар бүхий инженер, технологийн мэргэжилтэн бэлтгэх, инженерийн боловсролын өрсөлдөх чадварыг дээшлүүлэх, багшлах боловсон хүчний нөөцийг бэхжүүлэх, сургалтын орчныг шинэчилж, чанарыг сайжруулах зорилгоор Япон Улсад 1000 орчим хүнийг инженерийн чиглэлээр сургах төлөвлөгөө ажиллаж байгаа юм байна.
Тэгвэл “Коосэн” сургалтын хөтөлбөрийн хүрээнд Япон Улсад цахилгаан, мэдээлэл технологи, барилга, механикийн чилэлээр гурван жил суралцсан 21 төгсөгч сургуулиа амжилттай төгсөөд эх орондоо эргэн ирээд байна. Эдгээр төгсөгчдийг ажлын байранд зуучлах, эзэмшсэн мэргэжил, мэдлэг, чадварыг эх орныхоо хөгжил дэвшилд ашиглах зорилгоор “1000 инженер- ажлын байр” өдөрлөг өнөөдөр болж байна.
Энэ талаар ШУТИС-ийн Сургалт, оюутны асуудал эрхэлсэн проректор, академич Х.Энхжаргал “ШУТИС-ийн хэмжээнд гадаадын их сургуулиудтай хамтарсан 18 төсөл хөтөлбөр хэрэгждэг. Японд бакалаврын хамтарсан төслийн хүрээнд суралцсан 10 гаруй оюутан ирэх жил эх орондоо ирнэ. Эдгээр төгсөгчдийн ажлын байрыг урьдчилж бэлтгэж байгаа нь хэрэглэгч, төгсөгчдийн холбоог илүү бэхжүүлэх ач холбогдолтой.
Түүнчлэн ШУТИС дотооддоо анх удаа “Коонсэн” технологийн сургуулийг байгуулсан. Удахгүй эхний элсэлтийнхэн төгсөнө. Үүнтэй холбогдуулан ажлын байрны захиалгууд ирээд байна. Төгсөгчид үргэлжлүүлэн суралцах хүсэлтэй тохиолдолд 1.5 жилийн сургалтын хөтөлбөрийг бэлдсэн” гэв.
Өдөрлөгийн үеэр “МАК”, “АПУ”, “Говь”, “Гоёо”, “Таван богд” групп, ШУТИС-ийн “Коосэн” сургууль зэрэг байгууллагууд төгсөгчдийг хүлээн авч уулзан ажлын санал ирүүлснээ мэдээллэсэн юм.