Түрээсийн орон сууцны асуудлаар Засгийн газрын хуралдаанаас гаргасан шийдвэрийг Барилга, хот байгуулалтын сайд Х.Баделхан танилцууллаа. Тэрбээр "Засгийн газрын ээлжит хуралдаанаар Түрээсийн орон сууцыг өмчлүүлэх тухай журмыг баталлаа. Уг журмаар урьдчилгаа 30 хувиа төлөөд үлдсэн төлбөрийг ипотекийн зээлд хамруулах журмаар байрыг өмчилж болно. Эсвэл түрээслэгч төлбөрийн чадвартай бол тухайн байгууллагатайгаа тохиролцож, сар бүр тодорхой хэмжээний төлбөрөө төлсний үндсэн дээр өмчилж авч боломжтой. ТОСК-ийн зээлд хамрагдсан иргэд ч ялгаагүй энэ хувьчлалд хамрагдах боломжтой. Урьдчилгаа 30 хувийн төлбөрөө тухайн байгууллагатайгаа зөвшилцсөний үндсэн дээр 3-5 жилийн дотор төлж барагдуулна. 

ТОСК-д 1512 өрхийн түрээсийн орон сууц бий. Эдгээр өрх орон сууцаа түрээслэж авч болох журам батлагдсан. Гэхдээ энэ төлбөрт өдийг хүртэл түрээслэж ирсэн төлбөр багтахгүй гэдгийг анхаарах хэрэгтэй.

“Буянт-Ухаа 2” хорооллыг түрээсийн орон сууц болгох журмыг Засгийн газрын дараагийн хуралдаанаар оруулна. Үүнийг шийдэх эрх Засгийн газарт бий.

Одоо баригдаж байгаа 972 айлын орон сууцыг Хөгжлийн банкны санхүүжилтээр санхүүжүүлж байна. Өнөөдрийн байдлаар м.кв нь 1.4 сая төгрөгөөр тооцсон.

Өнгөрсөн онд ипотекийн зээлийн эх үүсвэрийг нэмэгдүүлэх үүднээс улсын төсвөөс олгож буй зээлийн эх үүсвэрийг дөрвөн хувийг нэг хувь хүртэл бууруулах Засгийн газрын тогтоол гарсан. Ингэснээр зээлийн эх үүсвэр хоёр дахин нэмэгдэх боломжтой. Хэдийгээр улсын төсвөөс олгож байгаа зээлийн эх үүсвэрийг нэг хувь болгон бууруулсан ч Монголбанк бууруулахгүй байна. Энэ асуудлыг сая Засгийн газрын хуралдаанд танилцуулахад гурван сайдын хамтарсан ажлын хэсэг гарч, дараагийн хуралдаанд танилцуулах үүрэг өгсөн.

Түрээсийн орон сууцыг нэмэгдүүлэх тал дээр ажиллаж байгаа ч өнөөдрийн байдлаар улсын төсвийн хөрөнгө оруулалтаар түрээсийн орон сууцыг нэмэгдүүлэх боломж алга. Улсын эдийн засаг энэхүү ачааллыг дийлэхгүй. Харин гадны зээл, тусламжаар нэмэгдүүлэх боломж бий. Тухайлбал, Дэнжийн 1000-д БНХАУ-ын буцалтгүй тусламжаар 1008 айлын орон сууц баригдаж байна. Ирэх жилийн сонгуулиас өмнө тус байрыг ашиглалтад оруулахаар төлөвлөж байна. Одоогоор гурван хороолол босох төлөвтэй байгаа.

Түрээсийн байраа өмчлөх хүсэлтэй иргэд хүсэлтээ ТОСК-т хүргүүлж, гэрээ байгуулна гэсэн үг.

Өнгөрсөн тавдугаар сард гаргасан судалгаагаар 44 мянган иргэн урьдчилгаа 30 хувиа төлж, ипотекийн зээл авах хүсэлтэй илэрхийлсэн" гэв.